Onandjokwe voer eerste ortopediese operasies uit

Onandjokwe Intermediêre Hospitaal het verlede week ’n mylpaal bereik met die suksesvolle uitvoering van sy eerste gewrigsvervangingsoperasies ná ’n tweedaagse ortopediese slypskool.

Dr. Albertina Nande, ’n mediese beampte in die departement vir ortopediese chirurgie, het aan Network Media Hub (NMH) gesê dat die slypskool op Ondangwa aangebied is deur die hospitaal se departement vir ortopediese chirurgie in samewerking met die Namibiese Chirurgiese Vereniging.

Sy het gesê die slypskool het die byeenkoms van ortopediese spesialiste uit sowel die openbare as die private gesondheidsorgsektor moontlik gemaak en ’n platform vir leer, mentorskap, samewerking en verbeterde dienslewering bevorder.

Die departement van ortopediese chirurgie van Onandjokwe bestaan tans uit twee ortopediese spesialiste, ondersteun deur nog sewe mediese beamptes.

Die hospitaal het Vrydag en Saterdag vier operasies suksesvol uitgevoer, insluitend die heel eerste volledige heupvervanging, asook volledige knievervanging.

Benewens die vier suksesvolle prosedures is daar steeds meer as 45 pasiënte wat op knie- en heupvervangings wag, het Nande gesê.

Hoewel die departement toegerus is, het Nande die belangrikheid beklemtoon om ’n betroubare en konsekwente voorsiening van inplantings vir toekomstige operasies te verseker.

KUNDIGHEID

Verlede week se slypskool het akademiese lesings en besprekings ingesluit, met insigte van ortopediese spesialiste en fisioterapeute.

“Aangesien dit die eerste departementele slypskool is, het ons uitsluitlik op chirurgie vir heup- en knievervanging gefokus,” het Nande gesê.

Dr. Akutu Munyika, visepresident van die Namibiese Chirurgiese Vereniging, het die belangrikheid van samewerking tussen professionele persone en instellings in gesondheidsorg benadruk.

“Die opvoedkundige voordele, suksesvolle operasies en spanwerk tussen spesialiste en gesondheidswerkers dui op ’n merkwaardige prestasie,” het hy gesê.

“Ons beskou hierdie slypskool as ’n reusesukses en ’n model vir toekomstige inisiatiewe in Namibië,” het Munyika gesê.

Intussen het die voormalige minister van gesondheid en maatskaplike dienste, dr. Kalumbi Shangula, gesondheidswerkers aangemoedig om hul stem te laat hoor oor die uitdagings wat die lewering van gesondheidsorg raak en om aktief vir die hulpbronne te pleit wat nodig is om gehaltepasiëntesorg te lewer.

Namens die hospitaal se ortopediese departement het die waarnemende senior mediese beampte, dr. Nduuvu Amutenya, aangekondig dat die ortopediese slypskool ’n jaarlikse instelling sal word.

“Ons visie is dat hierdie slypskool tot ’n jaarlikse platform vir opleiding, vernuwing, samewerking en uitsonderlike dienslewering sal ontwikkel,” het sy gesê.

– [email protected]