NOC bring kankerdienste na Noorde

Die konstruksie van ’n moderne kankerbehandelingsentrum op Ongwediva is uiteindelik ’n lig aan die einde van die tonnel vir pasiënte in die noorde van die land wat jare lank honderde kilometers na Windhoek moes reis vir behandeling.Die Namibiese Onkologiesentrum (NOC) het vandeesweek amptelik die sooispitseremonie vir die sentrum gehou, wat sowat N$150 miljoen sal kos.Konstruksie sal na verwagting reeds Maandag begin met die voltooiing van die projek wat vir Junie 2026 geskeduleer is.Volgens die NOC se finansiële direkteur, Stephanie Quarmby, sal die sentrum met sy voltooiing hulp en ondersteuning aan meer as 800 000 mense nader aan hul tuiste kan bied.Tans moet dié inwoners meer as 600 kilometer na die hoofstad vir kankerverwante dienste reis. Terwyl pasiënte met die nodige hulpbronne in staat is om die gereelde reise te onderneem, is daar egter verskeie wat dit nie kan bekostig nie en noodgedwonge hul behandeling staak.“Agter elke statistiek is ’n mensestorie. Agter die 600 kilometer wat ons noordelike pasiënte tans moet reis vir behandeling in Windhoek, lê skeiding en afsondering van hul families en ’n finansiële las tydens hul mees kwesbare oomblikke.“Agter elke diagnose wat vertraag word, lê ’n lewe wat met vroeër ingryping gered kon word. Vandag herskryf ons hierdie stories,” het sy gesê.“Die grond waarop ons staan, verteenwoordig meer as net ’n konstruksieterrein. Dit verteenwoordig waardigheid vir meer as 850 000 mense oraloor die streke van Oshana, Omusati, Ohangwena en Oshikoto.“Vir die eerste keer sal ’n ouma van Outapi chemoterapie ontvang, terwyl haar familie vir haar tuisgemaakte maaltye kan bring. ’n Pa van Ondangwa kan voortgaan met radioterapie sonder om te moet kies tussen behandeling en sy kinders se skoolfooie vir verblyf in Windhoek,” het Quarmby verduidelik.Volgens haar sal die NOC se sentrum in die noorde die volle spektrum van geïntegreerde onkologiedienste verskaf, insluitend radioterapie, chemoterapie, gespesialiseerde konsultasies asook ondersteunende sorg, gelykstaande aan dié wat elders in die land aangebied word.Volgens haar sal pasiënte dieselfde multidissiplinêre benadering, dieselfde moderne toerusting en dieselfde toewyding ontvang om nie net die siekte te behandel nie, maar die hele mens.“Die enigste verskil sal wees dat hulle in hul eie beddens kan slaap en wakker word, omring deur hul gemeenskap se ondersteuning en liefde.”‘SIMBOOL VAN HOOP’Die streek se goewerneur, Hofni Ipinge, was tydens die sooispitseremonie vol lof vir die NOC se belegging in die sentrum en sê dit sal ’n beduidende verskil in die lewens van inwoners in die noordelike dele van die land maak.“Vandag gaan oor meer as die begin van konstruksie. Dit is ’n simbool van hoop, toegang, waardigheid en toewyding.“Dis ’n herinnering dat ontwikkeling nie net gemeet word in geboue of begrotings nie, maar in lewens wat gered word, pyn wat verlig word en ’n toekoms wat bewaar word.“Hierdie perseel gaan binnekort ’n plek word waar lewens verander en in baie gevalle waar lewens gered word,” het Iipinge gesê.“Ons mense sal nie langer meer as 600 kilometer na Windhoek hoef te reis om toegang tot noodsaaklike kankerbehandeling en diagnostiese dienste te verkry nie.“Hierdie ontwikkeling bring gehalte-gesondheidsorg nader aan die huis. Dit versterk ons ondersteuningstelsels en gee families die kans om hul gesondheidsuitdagings saam aan te pak en dit nie ver van hul geliefdes nie.“Verder as gesondheidsorg is hierdie projek ’n katalisator vir ekonomiese groei. Dit skep werksgeleenthede beide direk deur konstruksie en die bedryf van die sentrum, maar ook indirek deur ondersteunende sektore.“Dit vestig Ongwediva as ’n middelpunt vir gesondheidsorg en maak die deure oop vir verdere belegging in gesondheid en infrastruktuur deur die private sektor,” het Iipinge gesê.Hy het ook die geleentheid gebruik om ’n beroep op die NOC te doen om te verseker die projek begin so vinnig as moontlik en dat dit teen die beloofde tyd voltooi sal word.Die kankeroorwinnaar Ndayelekwa Kayofa het ook haar storie gedeel oor hoe sy honderde kilometers na die hoofstad vir behandeling moes aflê. Sy het haar diepgaande dankbaarheid vir die sentrum uitgespreek.– republikein@republikein.com.na

NOC bring kankerdienste na Noorde

Kommentaar

Republikein 2025-09-11

Meld asseblief aan om kommentaar te lewer

NOC bring kankerdienste na Noorde

Kommentaar

Republikein 2025-09-11

Meld asseblief aan om kommentaar te lewer

MELD AAN

Advertensie