NNN: Medisyne, toerusting op pad

Die regering het N$164 miljoen aan vervaardigers van mediese toerusting toegeken wat binne die volgende drie maande afgelewer sal word.

En danksy die direkte verkryging van medisyne by vervaardigers het die diensvlak vir die verskaffing van medikasie van 49% voor dié ingryping tot 57% gestyg. 

Só het president Netumbo Nandi-Ndaitwah gister tydens haar staatsrede (Sona) gesê. 

Sy het ook gesê besparings wat danksy direkte verkope verkry is, is herlei en herbelê om nog medisyne aan te koop.

Aflewerings uit die toekenning van N$164 miljoen aan verskaffers van mediese toerusting sluit onder meer ’n rekenaartomografie (CT)-masjien vir die staatshospitaal op Keetmanshoop in, wat die eerste in die staat se gesondheidstelsel in die Suide sal wees. Ander toerusting wat in die volgende drie maande afgelewer sal word, sluit 126 elektrokardiogram (EKG)-masjiene, 22 mobiele X-straalmasjiene, 39 algemene ultraklankmasjiene en 548 monitors vir lewensbelangrike tekens (vital signs) in.

“Die regering gaan voort om hierdie verkrygingsbenadering te bevorder om voorraadvlakke te verhoog na die minimum teiken van 80% oor die hele stelsel, wat die minimum vereiste vir gehalte-gesondheidsdienste is. 

“Die regering se verkryging het ook die verspreiding van hierdie mediese toerusting in te sluit. Hierdie kostedoeltreffende model is daarop gemik om beduidende gapings in toerustingvoorraad by staatsgeriewe te vul,” het Nandi-Ndaitwah gesê. 

Volgens die president het voorrade van gesondheidsorgdienste, farmaseutiese vervaardigers en direkte kliniese dienste onder kliniese verkryging tot positiewe uitkomste en kostebesparende doeltreffendheid gelei.

Nandi-Ndaitwah sê 36 ambulanse is ook aangekoop en landswyd versprei om noodgesondheidsdienste te verbeter. ’n Verdere 34 voertuie is aangekoop waarvan 14 gebruik sal word in uitreik-aksies om voorkomende gesondheidsaktiwiteite in gemeenskappe te ondersteun.

In ’n “vinnige werwing” is 3 471 gesondheidspersoneel aangestel om beter dienslewering en korter wagtye by openbare gesondheidsgeriewe te verseker.

Met verwysing na Namibiërs wat met gestremdhede saamleef, het 51 000 volgens Nandi-Ndaitwah hulpmiddels in die oorsigjaar ontvang en is meer as 1 235 rolstoele aangekoop en versprei. Volgens haar is dit ’n belangrike stap om mobiliteit en volle deelname aan die samelewing te verseker. 

Vier klinieke en een gesondheidsentrum is ook voltooi, wat insluit die Onanghulo-kliniek, die opgraderings van die Ompundja-, Onamukulo- en Mabushe-kliniek, en die Aussenkehr-gesondheidsentrum. 

In die hoofstad is die Maxuilili-kliniek en Okuryangava-gesondheidsentrum nou 24 uur per dag insluitend naweke oop. Daarbenewens is vyf gespesialiseerde eenhede ten volle operasioneel en wel die intensiewesorgeenheid in die staatshospitaal op Katima Mulilo, eenhede vir dialise by die staatshospitale op Keetmanshoop, Katima Mulilo en Walvisbaai, asook ’n neonatale intensiewesorgeenheid by Swakopmund se distrikshospitaal.

Die staat se eerste geriewe vir onkologie buite Windhoek is in Februarie op Walvisbaai ingewy en bied noodsaaklike chemoterapiedienste aan staatspasiënte aan die kus. Die Onandjokwe Intermediêre Hospitaal se nuwe kraamsaal spog met 120 beddens, terwyl die intensiewesorgeenheid met 17 beddens by die Oshakati Intermediêre Hospitaal ook voltooi is. 

Nandi-Ndaitwah het ook verwys na die regering se suksesvolle hantering van ’n uitbreking van cholera op Opuwo, a-pokke in Swakopmund en Kongokoors op Gobabis wat almal onder beheer gebring is. 

’n Landswye inentingsyfer van 89% is behaal teen die tipe 2-poliovirus wat op Rundu en Gobabis en in Windhoek opgespoor is. 

“In ons pogings om dienste by openbare gesondheidsgeriewe te verbeter, het die regering warm water by die Windhoek Sentrale Hospitaal ná 15 jaar met ’n begroting van N$6,4 miljoen herstel. 

Die herstel van warm water by die Intermediêre Hospitaal Katutura is steeds aan die gang,” het Nandi-Ndaitwah gesê.

– [email protected]