Negatiewe toetsuitslag nie meer nodig vir o.12’s

Kinders onder die ouderdom van 12 jaar hoef nie meer bewys van hul inentingstatus of ’n negatiewe PCR-toets te toon om Namibië binne te kom nie. Die minister van gesondheid en maatskaplike dienste, dr. Kalumbi Shangula, het egter gemaan “elke poging moet aangewend word om te verseker dat familielede wat na Namibië reis, nie by grensposte in die toepassing van Covid-19-gesondheidsregulasies van mekaar geskei word nie”.Shangula het met die verlenging van die huidige regulasies vir nog ’n maand gesê mense wat ten volle ingeënt is, hetsy Namibiërs of buitelanders, kan die land sonder ’n negatiewe PCR-toets en met bewys van hul inentingstatus binnekom. Vir die res geld ’n negatiewe PCR-toets om toegang tot die land te verseker. ’n Persoon word as ten volle ingeënt beskou as hulle twee dosisse entstof of dan in die geval van Johnson & Johnson, een dosis, ontvang het. Die minimum-tydsverloop tussen die toediening van die laaste dosis en binnekoms in Namibië is 14 dae. Teen 12 Junie het 28% van die geoormerkte bevolking ’n eerste dosis entstof ontvang, terwyl 24% ten volle ingeënt is. Shangula het sy spyt uitgespreek aangesien 300 000 vervalde dosisse entstof vernietig moes word weens Namibiërs se traagheid om ingeënt te word.Met verwysing na digitale inentingsertifikate het die minister gesê toegang tot dié diens is deur middel van ’n skakel op al die ministerie se sosialemediaplatforms beskikbaar. Vir navrae kan die tolvrye nommer 0800 100 100 gekontak word. Volgens Shangula wys die verandering in die epidemiologiese koers van gevalle van Covid-19 in die land in lyn met protokol van die Wêreldgesondheidsorganisasie (WHO) dat die pandemie tans onder beheer is. Die ministerie gaan egter steeds voort om die voorkoms van gevalle op streek- en distriksvlak streng vir enige oplewing te monitor. Die meeste gevalle in die land word tans deur die BA.4 en BA.5-subvariante van die Omicron-variant gedryf wat hoogs aansteeklik is. Isolasie en kwarantyn is nou ook in pas met onlangse wetenskaplike bewyse wat na vyf dae vir asimptomatiese gevalle sowel as dié met matige simptome verlaag is. Hoewel die dra van maskers in openbare plekke nie meer verpligtend is nie, het Shangula ’n beroep op Namibiërs gedoen om dit steeds binnenshuis en op vliegtuie te dra. Shangula het verwys na die derde golf ’n jaar gelede waartydens die land op ’n enkele dag 1 206 nuwe gevalle en 32 sterftes aangeteken het. Dit het volgens hom die land genoop om drastiese stappe te doen om sy openbare gesondheidstelsel te versterk, wat insluit toegang tot mediese suurstof en beddens in intensiewesorgeenhede (ICU’s).Shangula het weer ’n beroep op Namibiërs gedoen om hulself teen Covid-19 te laat inent. “Ons data wys voortdurend die oorweldigende meerderheid gevalle wat in die hospitaal, hoësorg- en ICU beland en aan Covid-19 sterf, is mense wat nie ingeënt is nie.”Shangula sê maatreëls is ook landswyd in plek om enige gevalle van aappokke te identifiseer. Geen gevalle is nog in Namibië aangemeld nie en die land het die kapasiteit om enige gevalle deur middel van laboratoriumtoetse te bevestig. As deel van die ministerie se rol in siektebeheer, vind ’n tweedaagse vergadering met verwante rolspelers tans in Windhoek plaas om immuniseringsaktiwiteite te verhoog en hulpbronne hiervoor te mobiliseer. – henriette@republikein.com.na

Negatiewe toetsuitslag nie meer nodig vir o.12’s

Kommentaar

Republikein 2026-03-19

Meld asseblief aan om kommentaar te lewer

Negatiewe toetsuitslag nie meer nodig vir o.12’s

Kommentaar

Republikein 2026-03-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.