Namibië betaal minder vir TB-medisyne

Namibië trek voordeel uit ’n ooreenkoms wat bereik is tussen Suid-Afrika se Mededingingskommissie en die farmaseutiese reus Johnson & Johnson (J&J), tesame met sy filiaal Janssen Pharmaceuticals, waarvolgens J&J nie sy patent vir Bedaquiline, ’n sleutelmedikasie vir tuberkulose (TB) in 134 lae- en middelinkomstelande sal afdwing nie. Namibië het verlede jaar sowat 9 200 pasiënte met TB aangemeld – ’n toename vanaf die 8 604 gevalle in 2022, wat ’n styging van 6,9% weerspieël. Met ’n jaarlikse voorkomssyfer van 450 gevalle per 100 000 bevolking, is die land tans gelys as die 11de hoogste land uit 30 lande wêreldwyd in terme van die TB-voorkomskoers. Soos in die res van suidelike Afrika word dit grootliks toegeskryf aan sosioëkonomiese uitdagings, sowel as die relatief hoë voorkoms van MIV.Namibië gebruik reeds die medikasie in kombinasiebehandelings vir middelweerstandige vorme van TB sedert 2016. Die land se riglyne is in ooreenstemming met die Wêreldgesondheidsorganisasie (WHO) se voorstelle en soortgelyk aan diè van Suid-Afrika. Volgens die ooreenkoms sal J&J ook die prys wat hy die buurland se gesondheidsdepartement vir die middel vra met 40% verlaag. Deur nie die patent af te dwing nie, sal J&J die mark oopmaak vir generiese verskaffers wat na verwagting die prys van die middel nog verder sal verlaag.Die uitvoerende direkteur van gesondheid en maatskaplike dienste, Ben Nangombe, sê Suid-Afrika is een van die grootste markte vir Bedaquiline en die buurland se gesondheidsdepartement het beduidende bedingingsmag om saam met kampvegters oor pryse te onderhandel.“Ons trek stroomaf voordeel uit die onlangse ooreenkoms deur die medikasie teen laer pryse te koop. “Dit is óf wanneer Johnson & Johnson en Janssen hul pryse verlaag soos nou, óf wanneer nuwer vervaardigers die mark betree as gevolg van die mededinging weens die verslapte patentvoorwaardes,” het Nangombe verduidelik.In die geval van enige ander nuwe TB-medikasie of -entstowwe, trek Namibië volgens hom voordeel uit tegniese voordele van die WHO, evaluering deur die ministerie se nasionale program vir TB en melaatsheid asook plaaslike keuring deur die Namibiese Medisynebeheerraad.“Dis om te verseker dat die bekendstelling van nuwe produkte beide geregverdig en veilig vir die Namibiese publiek is,” het Nangombe gesê.Tans en buiten navorsing is die enigste entstof wat internasionaal vir TB voorgestel word, Bacillus Calmette-Guerin (BCG) wat reeds aan pasgebore babas in Namibië gegee word en reeds vir sowat 100 jaar in gebruik is.“Die entstof voorkom dat kinders aan ernstige komplikasies weens TB ly, maar is ongelukkig nie doeltreffend genoeg om die siekte te voorkom nie.”TB teiken hoofsaaklik mense met verminderde weerstand soos jong kinders of mense wat met MIV saamleef, diegene met sekere toestande soos wanvoeding, diabetes en silikose, sowel as diegene wat rook of dwelmversteurings het. – henriette@republikein.com.na

Namibië betaal minder vir TB-medisyne

Kommentaar

Republikein 2026-02-03

Meld asseblief aan om kommentaar te lewer

Namibië betaal minder vir TB-medisyne

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.