Namibië mis 34% van TB-gevalle

Namibië mis steeds na raming 34% van tuberkulose (TB)-gevalle ten spyte van die feit dat die land sterk sukseskoerse in behandeling behaal het.Die minister van gesondheid en maatskaplike dienste, dr. Esperance Luvindao, sê 8 370 TB-pasiënte is in 2024 in Namibië met dié siekte gediagnoseer. Dit sluit 293 middelweerstandige gevalle in. Sy het op Gobabis tydens die vieringe van Wêreld-TB-dag egter gemaan ’n beduidende aantal infeksies bly steeds onopgespoor. “Terwyl hierdie getalle lewens verteenwoordig wat gered is, lê ons kommer by dié mense wat ons nie bereik het nie,” het die minister gesê. Sy het gemaan dat ongediagnoseerde gevalle steeds oordrag aandryf.Wêreldwyd bly TB een van die dodelikste aansteeklike siektes, met 10,7 miljoen mense wat met die siekte gediagnoseer is en 1,23 miljoen TB-verwante sterftes wat in 2024 aangeteken is.Luvindao het beklemtoon dat die situasie veral ernstig is in die Omahekestreek, wat die hoogste TB-voorkomsyfer in die land het. Sy het dit toegeskryf aan die streek se yl bevolking en die lang afstande tussen plase, nedersettings en gesondheidsgeriewe wat toegang tot diagnose en behandeling bemoeilik.Om die gaping te takel, het Luvindao gesê die ministerie het die opsporing van aktiewe gevalle verhoog. Dit sluit die ontplooiing van mobiele siftingspanne in, wat toegerus is met digitale X-straaltegnologie om pasiënte in afgeleë gemeenskappe te identifiseer wat nog nie gediagnoseer is nie.Ten spyte van die uitdagings, het Luvindao gesê Namibië het noemenswaardige vordering gemaak om TB onder beheer te bring. Namibië het in 2024 ’n sukseskoers van 87% vir behandeling aangeteken wat net onder die Wêreldgesondheidsorganisasie (WHO) se teiken is. Die sukseskoers vir middelweerstandige TB het toe op 75% gestaan, wat globale teikens oortref.Luvindao het ook gewys op verbeterings in die bestuur van die TB/MIV-pandemie. Byna alle TB-pasiënte word nou vir MIV getoets en 99% van dié wat positief toets, begin met antiretrovirale terapie (ARV). Gevolglik het die voorkoms van MIV onder TB-pasiënte van meer as 65% in 2005 tot 32% in 2025 gedaal.Tydens die geleentheid het die minister ook die vyfde uitgawe van Namibië se nasionale riglyne vir die bestuur van tuberkulose amptelik bekend gestel. Die riglyne is daarop gemik om die land se reaksie op die siekte te versterk. Die hersiene riglyne fokus op die uitbreiding van die opsporing van gevalle, die verbetering van diagnostiese en behandelingsbenaderings, opgeskerpte voorkomende terapieë en die prioritisering van sorg wat op die pasiënt fokus.Sy het beklemtoon dat volgehoue vooruitgang sterker plaaslike finansiering asook gekoördineerde pogings uit alle sektore sal vereis namate wêreldwye finansiële steun afneem.“Die stryd teen TB vereis dat elke sektor van die samelewing betrokke moet wees,” het Luvindao beklemtoon.Sy was vol lof vir gesondheidswerkers en dié wat gesondheid in gemeenskappe bevorder, vir die rol wat hulle in die bekamping van TB. Die minister het hulle as die ruggraat van die land se reaksie tot die siekte beskryf.Wêreld-TB-dag is onder die tema: “Ja! Ons kan TB beëindig. Gelei deur lande. Gedryf deur mense,” gevier met die klem op nasionale leierskap en die deelname van gemeenskappe om die siekte uit te wis. – tuyeimo@nmh-hub.com.na

Namibië mis 34% van TB-gevalle

Kommentaar

Republikein 2026-06-26

Meld asseblief aan om kommentaar te lewer

Namibië mis 34% van TB-gevalle

Kommentaar

Republikein 2026-06-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.