’n Heilige ruimte

Reeds vir ’n wyle vang sy paartjies se kosbaarste en ook heiligste oomblikke met haar kamera vas. As geboortefotograaf, stil, ongemerk en op die agtergrond die oomblik wanneer ’n baba sy of haar eerste asemteug gee. Later ook families en troues. Nou het Janice Thompson ’n nuwe passie en onderneming wat God verlede jaar op haar hart geplaas het.“Teen die einde van verlede jaar wou ek net rus. Ons is so besig om van die een ding na die ander te hardloop, die volgende fotosessie of geleentheid, dat ons weinig tyd maak om te rus. En wanneer ons dit doen, sit ons voor die televisie of met ons selfoon in die hand,” sê Janice.Maar sy wou regtig rus – sonder enige onderbrekings, sonder ’n moet-doen-lysie of gedagtes wat rondspring en haar aandag voortdurend daarvan aflei om net regtig stil te word. “Ek wou my volkome met God se teenwoordigheid deurdrenk en kon net nêrens ’n plek vind om in hierdie diep behoefte te voldoen nie,” vertel sy. Haar begeerte om in stilword in God se teenwoordigheid te rus, lei tot die geboorte van Janice se nuwe onderneming nooh-ahk wat afgelei is van die Hebreeuse woord nuach. “Dit beteken om te rus, te vestig of te vertoef. Dis ’n vreedsame toestand van om te bly – anders as Shabbat, wat daaroor gaan om op te hou werk.”Hierdie onderskeid is belangrik, sê Janice. “Noo-ahk is nie net ’n pouse van aktiwiteit nie, dis ’n uitnodiging na ’n gevestigde, inwonende soort rus. Dis die perfekte naam vir wat ek wou skep – ’n gevestigde inwonende soort rus. Om te rus en stil te wees.”Dis ’n welstandservaring gegrond op geloof en intensie, ontwerp vir enigiemand wat vir ’n wyle net wil uitasem, verduidelik sy. “Jy kom geklee in jou gemaklikste klere, bring ’n ligte kombers en ’n kussing en laat jouself toe om net te wees.”Janice begin die sessie met ’n kort bekendstelling, met deelnemers wat met die hulp van oorfone na ’n spesiaal saamgestelde speellys luister, terwyl hulle lê en net ontspan. “Dis ’n uur van doelbewuste stilte, rus en vernuwing. ’n Heilige ruimte wat net vir jou saamgestel is,” sê Janice.Daar is geen hipnotisme betrokke nie en die praktyk word nie ontleen uit Oosterse meditasie-tradisies nie, beklemtoon sy. “Dit is spesifiek gewortel in ’n Christelike begrip van rus.Sy speel slegs aanbiddingsmusiek, want “ons het genoeg geraas in ons daaglikse lewens, daarom speel ek doelbewus net aanbiddings- of lofprysingsliedere”. Janice erken dit is al ’n geruime tyd ’n begeerte by haar om dit te kan ervaar. “Jy kan seker sê jy kan dit in jou huis doen, maar dis eenvoudig nie dieselfde nie.”Sedert sy met nooh-akh begin het, is sy oorweldig deur die positiewe terugvoer, vertel Janice. Elkeen wat dit ervaar het, is dit eens dat dit presies was wat hulle nodig gehad het. Ander kon weer nie glo dat hulle so kon rus en eers tien minute nadat die sessie geëindig het, eers weer wakker geword het nie. “Dit is ’n onbekende konsep en moeilik om aan ander te verduidelik, maar as jy eers ’n sessie bygewoon het, sal jy verstaan,” sê Janice. Vir nou is haar fokus om nooh-ahk met die hulp van die persoonlike ervaring van deelnemers die boodskap van rus verder uit te dra en om die sessies steeds intiem te hou. Vir die toekoms is daar korporatiewe welstand en om dieselfde begeleide rusformaat na ’n werkplekomgewing te bring. Vir meer inligting oor nooh-ahk en die geleentheid om vir ’n wyle regtig tot stilstand te kom en te rus, kan Janice by 081 762 0645 gekontak word of stuur ’n e-pos aan noohahksessions@gmail.com. – henriette@republikein.com.na

’n Heilige ruimte

Kommentaar

Republikein 2026-09-09

Meld asseblief aan om kommentaar te lewer

’n Heilige ruimte

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.