Meer mans as vroue ent teen Covid

Meer mans as vroue en meestal Namibiërs met ’n tersiêre onderrig verkies om hulle teen Covid-19 te laat inent.

Dis ook meesal ouer volwassenes, terwyl dié in die ouderdomsgroep 18 tot 25 jaar verkies om nie ingeënt te word nie. Onvrugbaarheid en ’n rede om die ontvanger van die entstof só na te spoor, is die grootste wanopvattings oor entstowwe teen Covid-19 in die land, volgens ’n opname wat Afrobarometer uitgevoer het.

Namibiërs het oor die algemeen gemengde reaksies teenoor die regering se hantering van die Covid-19-pandemie, is skepties oor entstowwe en krities oor korrupsie.

Afrobarometer se jongste opname het gewys hoewel ’n meerderheid van Namibiërs die regering se algehele reaksie tot die pandemie goedkeur, is hulle krities oor onvoldoende verligting, korrupsie en skepties oor entstowwe se veiligheid.

Die meerderheid inwoners is tevrede dat ontwrigtings van kinders se onderrig tot ’n minimum beperk is en dat hospitale voldoende voorraad het om in die aanvraag wat die pandemie gebring het, te voldoen.

Tog is die meerderheid inwoners krities oor die ondersteuning wat aan kwesbare gesinne gebied is, met die meeste wat glo dat hulpbronne wat vir die bekamping van die pandemie geoormerk was weens korrupsie deur die regering verlore gegaan het.

Die meeste is ook nie oortuig van die regering se vermoë om te verseker dat entstowwe veilig is nie en betwyfel of die regering vir ’n toekomstige openbare gesondheidsnoodgeval voorberei is.

Slegs 16% van Namibiërs het volle vertroue in die regering se vermoë om te verseker dat entstowwe veilig is, terwyl 30% geen vertroue in die regering se vermoë het nie.

Meer as ses uit elke tien respondente voel die regering het die pandemie “redelik goed” hanteer, terwyl dieselfde getal “redelik tevrede” voel die ontwrigting van kinders se onderrig is tot ’n minimum beperk.

Sowat 57% sê hospitale het genoeg voorrade gehad om in die aanvraag van die pandemie te voldoen. Dit blyk uit die opname dat die ondersteuning van kwesbare mense die meeste kritiek van respondente uitgelok het, met 57% wat sê hulle is glad nie tevrede met die ondersteuning wat aan kwesbare huishouding tydens die pandemie gebied is nie.

Met verwysing na korrupsie is meer as tweederdes dit eens dat van die hulpbronne wat vir die reaksie tot die pandemie bestem was, weens staatskorrupsie of verlore gegaan of gesteel is.

Meer as 63% glo die regering is geensins voorberei om enige toekomstige gesondheidsnoodgevalle te hanteer nie.

Die mees algemene rede om inenting te weier, is ’n wantroue in die veiligheid en doeltreffendheid van die entstof. Een van die gewildste wanopvattings oor entstowwe is dat dit onvrugbaarheid veroorsaak of gebruik word om die ontvangers na te spoor.

Skeptisisme oor die werklike omvang van die risiko’s wat met Covid geassosieer word, sorg vir ’n verdere 10%.

Dit is veral jong volwassenes (18 tot 25 jaar) wat verkies om hulle nie teen Covid te laat inent nie, terwyl minder vroue as mans die entstof ontvang het. Ook is dit meestal Namibiërs met ’n tersiêre onderrig wat hulself teen die virus laat inent. – [email protected]