Meer as N$28,7 m. vir universele gesondheidsorg

Die ministerie van gesondheid en maatskaplike dienste (MoHSS) het ’n ambisieuse implementeringsplan vir universele gesondheidsdekking (UHC) bekend gestel wat na raming meer as N$28,7 miljoen oor vyf jaar sal kos. Dit kom te midde van druk van die regering om toegang tot gesondheidsorg te verbeter en die finansiële las op pasiënte te verminder.

Die plan vorm deel van Namibië se breër langtermynvisie om die dekking van universele gesondheidsorg oor die volgende tien tot 20 jaar te bereik. 

Volgens die ministerie dek die huidige vooruitskattings slegs die eerste fase van implementering wat oor die 2023-’24- tot 2027-‘28-boekjare strek.

Die beleidsraamwerk bevat sewe sleuteldoelwitte wat daarop gemik is om Namibië se gesondheidsorgstelsel te versterk, dienslewering te verbeter en billike toegang tot gesondheidsorgdienste vir alle burgers te verseker.

Die grootste deel van die beraamde begroting is toegeken aan die versterking van die bestuur van die openbare gesondheidstelsel, verantwoordbaarheid en gemeenskapseienaarskap van gesondheidsorg. Meer as N$15,8 miljoen sal na verwagting hieraan bestee word oor die implementeringstydperk van vyf jaar. Jaarlikse toewysings sal konsekwent oor die volle tydperk geallokeer word. 

Volgens die ministerie fokus die implementeringskoste hoofsaaklik op koördinering, optrede en die belyning van universele doelwitte vir gesondheidsdekking met ander nasionale beleidsrigtings en strategieë.

Die uitbreiding van toegang tot omvattende gesondheidsorgdienste, insluitend voorkomende, genesende, rehabiliterende en palliatiewe sorg, is nog ’n belangrike fokusarea onder die beleid.

Die regering beplan om miljoene in die uitbreiding van gesondheidsorgdienste in lyn met die primêre benadering tot gesondheidsorg te belê.

Die implementeringsraamwerk prioritiseer ook pasiënt-gefokusde gesondheidsorg, met befondsing wat opsy gesit is om die gehalte, veiligheid en doeltreffendheid van gesondheidsorgdienste te verbeter, terwyl verseker word dat dit in pas is met die behoeftes en waardes van pasiënte.

Die regering is verder van voorneme om finansiële beskermingsmeganismes te versterk om te verseker dat Namibiërs nie aan finansiële probleme blootgestel word wanneer hulle gesondheidsorg- en maatskaplike welsynsdienste versoek nie.

Die beleid beklemtoon die behoefte aan doeltreffende en volhoubare finansieringstelsels vir gesondheidsorg. Die aanpak van ongelykhede in toegang tot gesondheidsorg word ook duidelik in die plan genoem.

Die ministerie sê hulpbronne sal aangewend word om strukturele struikelblokke te verwyder wat toegang tot omvattende gesondheidsdienste beperk, veral vir kwesbare en onderbediende gemeenskappe.

Daarbenewens poog die raamwerk om die gesondheidsorgstelsel se veerkragtigheid en reaksietyd op toekomstige bedreigings en noodgevalle te verbeter om ontwrigtings in gesondheidsorgdienste tydens krisisse te verminder.

Die ministerie beplan ook om in die verbetering van breër dryfvere van gesondheid deur middel van ingrypings wat in lyn is met die primêre benadering vir gesondheidsorg te belê.

Die algehele implementeringskoste sal na verwagting ’n hoogtepunt van N$7,38 miljoen gedurende die 2024-’25-boekjaar bereik, voordat dit geleidelik in die daaropvolgende jare sal daal.

Die ministerie, as die bewaarder van die UHC-beleid, sal leierskap, rigting en toesig tydens die implementeringsfase verskaf en deur ander ministeries en regeringsagentskappe ondersteun word.

Volgens die ministerie dien die aksieplan vir implementering as ’n hoëvlakraamwerk wat uiteindelik in meer gedetailleerde nasionale gesondheidsbeleide, strategieë, jaarlikse operasionele planne en begrotings omgeskakel sal word. – [email protected]