Medisynetekort 'kritiek' by Okahandja-staatshospitaal

Die staatshospitaal op Okahandja staar ’n ernstige krisis in die gesig aangesien byna al die noodsaaklike medisyne sedert Junie vanjaar uit voorraad is.Dit volgens ’n verslag wat deur die onderburgemeester, Akser Aupindi, saamgestel is ná sy besoek aan die hospitaal verlede week, wat ernstige kommer oor pasiënte se veiligheid en openbare vertroue in die dorp se gesondheidsorgstelsel wek.Hy het die hospitaal op 12 Augustus besoek na aanleiding van berigte van ’n gevangene wat geweier het om sonder sy medikasie na ’n polisiesel terug te keer. Tydens die besoek het hy glo ontdek die hospitaal se apteek is grotendeels leeg, wat na bewering sowat 94,6% van pasiënte sonder die nodige medisyne laat.“Die afwesigheid van kritieke medikasie stel lewens in gevaar en ondermyn die publiek se vertroue in ons gesondheidsorgstelsel,” het Aupindi in ’n brief aan die minister van gesondheid en maatskaplike dienste, dr. Esperance Luvindao, geskryf. Hy het gewaarsku die situasie kan tot meer sterftes lei indien daar nie onmiddellik opgetree word nie.Die lys van items wat volgens die verslag nie in voorraad is nie, sluit lewensreddende medisyne in soos natriumvalproaat (wat gebruik word om migraines te voorkom en as behandeling vir epilepsie en bipolêre versteuring), olanzapien (antipsigotiese medisyne), augmentin-inspuitings (antibiotika) en fenobarbitoon (vir behandeling van epilepsie) asook entstowwe vir kinders en noodsaaklike neonatale vloeistowwe. Volgens die verslag het die hospitaal beperkte voorraad van sommige medisyne, insluitend amiloried-2,5 mg met HCTZ-25 mg-tablette (vir behandeling van hoë bloeddruk), multivitamiene en karvedilol 12,5 mg-tablette (hartmedikasie). In teenstelling hiermee is daar glo te veel flukonasool 200 mg-kapsules (antifungale medikasie) in voorraad.“Dit op sigself waarborg dat die hospitaal slegs oop is vir werkers om hul salarisse te ontvang, nie om dienste aan ons mense te lewer nie. Ons kan nie toelaat dat ons mense hierdeur gaan nie,” het Aupindi gesê.Die krisis word glo vererger deurdat die hospitaal se twee ambulanse na bewering buite werking is, wat personeel dwing om op ’n bakkie van die regering (GRN) staat te maak om pasiënte te vervoer, ’n oplossing wat sorg bemoeilik, veral vir pasiënte wat dringende behandeling benodig.Hy het ’n beroep gedoen op dringende ingrypings om medikasie aan te vul en die hospitaal se kapasiteit te verbeter. Indien dit nie moontlik is nie, beveel hy aan dat die tydelike sluiting van die hospitaal oorweeg word totdat ’n volhoubare oplossing geïmplementeer kan word.Aupindi het verder gesê dat hy, as leier van die dorp, inwoners sal mobiliseer om die sluiting van die hospitaal te eis totdat ’n duidelike plan verskaf word oor hoe die situasie opgelos gaan word, en bygevoeg: “Ek glo dit is die enigste taal wat jy verstaan.”Network Media Hub (NMH) het die woordvoerder van die gesondheidsministerie om kommentaar genader, maar het teen druktyd nog geen reaksie ontvang nie. – aurelia@nmh-hub.com.na

Medisynetekort 'kritiek' by Okahandja-staatshospitaal

Kommentaar

Republikein 2025-12-15

Meld asseblief aan om kommentaar te lewer

Medisynetekort 'kritiek' by Okahandja-staatshospitaal

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.