Marieke se navorsing vereer

’n Navorsingsopsomming van ’n fisioterapeut van Swakopmund en lid van die Namibiese vereniging vir fisioterapie (NSP) is met die tweede plek bekroon vir die beste opsomming wat by die Wêreldfisioterapie Afrika-streekkonferensie in Junie in Kigali, Rwanda, aangebied is. 

Marieke Kirchner se studie is onder die vaandel Validering van die Wêreldgesondheidsorganisasie (WHO) se rehabilitasie-bevoegdheidsraamwerk – Globale Fisioterapie-bevoegdheidsanalise en is deur haar studieleier prof. Marianne Unger by die konferensie in Kigali aangebied. Maryke se navorsing was vir haar meestersgraad in fisioterapie.

Die sekretaris van die NSP se uitvoerende komitee, Josephine Nangula, het die vereniging by die konferensie verteenwoordig. 

Die konferensie is deur fisioterapeute, opvoeders, navorsers, beleidmakers en leiers van oraloor Afrika bygewoon om kennis uit te ruil, professionele netwerke te versterk en die toekoms van fisioterapie te vorm.

Volgens Josephine sien sy uit daarna om die waardevolle leerervarings in Kigali plaaslik toe te pas om fisioterapie in Namibië verder te bevorder. – [email protected]