Ma eis ná seun se dood in psigiatriese sorg

Maria Alweendo, ‘n gebroke ma van Uuyoka in die Oshikotostreek, het ‘n skadevergoedingseis van N$10 miljoen teen die ministerie van gesondheid en maatskaplike dienste ingestel ná die dood van haar 16-jarige seun laat in 2023. Karel Ndakolo is dood terwyl hy onder psigiatriese sorg in die Oshakati-staatshospitaal was. Volgens Alweendo is sy nie deur hospitaalpersoneel oor haar seun se dood ingelig nie, maar moes sy dit na bewering op ‘n plaaslike radiostasie en uit nasionale nuusdekking hoor. Volgens ‘n verslag wat in November 2023 deur die polisie in Oshana uitgereik is, het ‘n verpleegster op Ndakolo afgekom waar hy bewusteloos op die vloer gelê het. ‘n Ander pasiënt was glo besig om herhaaldelik op sy maag te spring. Ndakolo is kort hierna dood verklaar. Sy ma het die vergoedingseis in Oktober 2024 deur haar regspan Kadhila Amoomo Legal Practitioners by die hoërhof in Windhoek ingedien. Alweendo beskuldig mediese personeel van growwe nalatigheid wat volgens haar tot die geweldadige dood van haar seun gelei het. Volgens die hofdokumente het die nadoodse verslag die tienerseun se dood toegeskryf aan trauma weens beperkte asemhaling as gevolg van borsbeserings. Die hofdokumente sê Ndakolo, ‘n graad 10-leerling verbonde aan die Nehale Senior Sekondêre Skool in die Oshikotostreek, is op 20 Oktober 2023 in Saal 16 opgeneem weens vermoedelike geestesongesteldheid. KommerFamilielede, ingesluit Alweendo, het glo kommer uitgespreek oor die veiligheid en geskiktheid van die saal waar die tiener uitgeplaas is. Teen spyte van hul waarskuwings het die hospitaal glo versuim om Ndakolo na ‘n veiliger area te verskuif. Enkele dae later op 23 Oktober is Ndakolo na bewering deur ander pasiënte in dieselfde saal aangerand. Hy is gevolglik na Saal 3 vir die behandeling van sy beserings oorgeplaas. Volgens Alweendo se hofdokumente is Ndakolo op 22 November wéér aangeval en dié keer ten aanskoue van ‘n verpleegster wat gesien het hoe ‘n ander pasiënt op hom spring en wat tot sy dood sou lei. VerliesAlweendo soek N$10 miljoen in skadevergoeding en verwys na die hospitaal se beweerde versuim om haar seun se kwesbaarheid te evalueer; gebrekkige kommunikasie ná die aanvanklike aanranding; sy heropname tot ‘n onveilige saal sonder voldoende toesig; die verwaarlosing van beloofde veiligheidsmaatreëls, asook die versuim om die tweede en dodelike aanranding ten spyte van duidelike waarskuwingstekens te voorkom. Die vra vir N$2,2 miljoen vir posttraumatiese en toekomstige mediese uitgawes, N$800 000 vir mediese en begrafniskoste, N$2 miljoen vir pyn en lyding en N$5 miljoen vir emosionele nood en verlies aan kameraadskap.Die ministerie wat deur die kantoor van die staatsprokureur verteenwoordig word, het teen druktyd nog nie sy antwoordende beëdigde verklarings ingedien nie. Geen verdere inligting oor 'n arrestasie in verband met Ndakolo se dood was ook teen druktyd beskikbaar nie. - republikein@republikein.com.na

Ma eis ná seun se dood in psigiatriese sorg

Kommentaar

Republikein 2026-01-29

Meld asseblief aan om kommentaar te lewer

Ma eis ná seun se dood in psigiatriese sorg

Kommentaar

Republikein 2026-01-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.