Luvindao ontken tekort aan ambulanse veroorsaak sterftes

Die minister van gesondheid en maatskaplike dienste het bewerings verwerp dat die sterftes van ’n hoogswanger vrou en haar suster in ’n ongeluk by Mariental veroorsaak is deur die onbeskikbaarheid van ambulanse.

Dr. Esperance Luvindao sê berigte dat geen noodvoertuie beskikbaar was nie, onakkuraat is.

Luvindao het Donderdag in die parlement op vrae van Lilani Brinkman, ’n parlementslid van Independent Patriots for Change (IPC), gereageer wat kommer uitgespreek het oor tekorte van ambulanse en ambulansbestuurders en die operasionele status van die suurstofaanleg by Mariental-staatshospitaal.

Brinkman het gesê daar is berig dat die Mariental-staatshospitaal ’n ernstige tekort aan vervoer ervaar, wat sy vermoë beïnvloed om kritieke siek pasiënte te vervoer, terwyl onlangse skofveranderings vir ambulansbestuurders die situasie vererger het.

Sy het verder beweer dat die vervoeruitdagings gelei het tot die dood van ’n vrou wat agt maande swanger was en haar suster, wat na bewering in ’n polisiebakkie vervoer is, omdat ambulansdienste nie beskikbaar was nie, asook die dood van ’n vyf maande oue baba wat glo nie betyds verwys kon word nie, weens die afwesigheid van vervoer of ’n ambulansbestuurder.

Die vrae spruit uit die noodlottige ongeluk nege maande gelede naby Mariental waarin ’n hoogswanger vrou, haar ongebore baba en haar suster onder die slagoffers was. 

Die ongeluk het die lewens van 12 korrektiewe beamptes, twee polisiebeamptes en twee burgerlikes geëis nadat twee voertuie op die B1-pad sowat sewe kilometer noord van Mariental gebots het.

Destyds het vier polisiebeamptes gereageer om Diana Jagger (29) by te staan, wat in kraam gegaan het en geen vervoer na die hospitaal gehad het nie. Hulle het Jagger en haar suster, Roseltha Higoam (35), opgelaai, maar het nooit die hospitaal bereik nadat hulle in die ongeluk was nie.

Die destydse inspekteur-generaal van die Namibiese polisie, luitenant-generaal Joseph Shikongo, het bevestig 14 mense het op die toneel gesterf terwyl twee polisiebeamptes later aan hul beserings beswyk het. Hy het ook gesê die tragedie strek verder as die 16 sterfgevalle, omdat Jagger, ’n ma van vyf kinders, se ongebore baba volledig ontwikkel was. Familielede het egter gesê sy was agt maande swanger met ’n tweeling.

In reaksie op Brinkman se aantygings het Luvindao gesê die ministerie erken die behoefte aan betroubare ambulansdienste, maar betwis berigte dat geen ambulanse tydens die ongeluk beskikbaar was nie.

“Daar is berig dat ’n swanger ma en haar suster hul lewens verloor het weens die onbeskikbaarheid van ambulansdienste en dat hulle in ’n polisiebakkie vervoer is. 

“Alhoewel die verlies aan lewens diep betreurenswaardig is, is die berig onakkuraat deur aan te neem dat geen ambulanse beskikbaar was nie. 

“In werklikheid het drie ambulanse op die massa-ongeluk gereageer, insluitend twee van die gesondheidsministerie en een van die munisipaliteit,” het sy gesê.

Die minister het bygevoeg dat die Mariental-distrik nege ambulanse op sy meesterlys het, waarvan vyf tans operasioneel is. Drie is by Mariental-staatshospitaal gestasioneer, terwyl twee by gesondheidsgeriewe by Maltahöhe en Sesriem gebaseer is.

“Op die betrokke dag het die hospitaal drie ambulanse in werkende toestand gehad, dus was vervoer nie die probleem nie,” het Luvindao gesê.

Oor personeel het sy tekorte aan noodversorgingspraktisyns (ECP’s) en ambulansbestuurders erken.

Volgens die minister is slegs vyf van die hospitaal se 11 ECP-poste gevul, terwyl drie van die vier poste vir ambulansbestuurders by Mariental-staatshospitaal gevul is, wat een vakature laat.

Sy het gesê werwing om die vakante poste te vul is aan die gang en dat die ministerie skofbestuur en die toekenning van hulpbronne hersien om reaksiedienste vir noodgevalle te verbeter.

SUURSTOFVOORSIENING

Brinkman het ook die ministerie se hantering van suurstofvoorsiening by die Mariental-staatshospitaal bevraagteken. Sy het beweer dat ondanks die bestaan van ’n ten volle funksionele suurstofaanleg, bestuur verkies het om suurstofsilinders aan te koop eerder as om die aanleg te diens, wat pasiënte se lewens in gevaar stel.

Luvindao het gesê ’n ondersoek na die beweerde probleme oor suurstofvoorsiening is van stapel gestuur en dissiplinêre stappe sal geneem word indien nalatigheid of wanbestuur gevind word.

Sy het gesê voorlopige verslae dui daarop dat die hospitaal se suurstofaanleg wanfunksioneer het, wat die fasiliteit genoop het om sy voorraad suurstofsilinders as ’n noodmaatreël te verhoog.

“Die diens van die suurstofaanleg is ’n onmiddellike prioriteit. Fondse is vir die herstel daarvan toegeken,” het die minister gesê.

Sy het bygevoeg dat die aanleg ná geringe dienswerk op 2 September 2025 weer aangeskakel is, terwyl bykomende onderdele bestel is om ’n groot diens te voltooi.

– [email protected]