Luvindao berispe laks laatskommers

Die minister van gesondheid en maatskaplike dienste, dr. Esperance Luvindao, het ’n streng waarskuwing aan gesondheidsorgwerkers gestuur wat laat vir werk aanmeld en gesê dit ondermyn gesondheidsorg.“Om laat by die werk aan te kom is nie ’n geringe administratiewe versuim nie,” het die minister verlede week gesê.“Dit is ’n onreg teenoor die pasiënte wat vir jou wag. Dit ontwrig dienslewering, bring dringende sorg in gedrang en vreet aan die vertroue wat ons mense in ons stel,” het Luvindao by die inwyding van die Mabushe-gesondheidsorgkliniek van N$8,9 miljoen gesê.Die kliniek met 13 kamers is in die Mashare-kiesafdeling van die Kavango-Oosstreek geleë en vervang die ouer weergawe waarvan die bedrywighede herhaaldelik deur seisoenale vloede oorstroom en ontwrig is.Luvindao het die personeel van die Mabushe-kliniek aangespoor om werksure na te kom en ’n “absolute sin vir plig, sorg en aanspreeklikheid” te toon.“Pasiënte behoort nooit onnodig te ly, omdat die professionele persone aan wie hul lewens toevertrou is, nie by hul diensposte is nie,” het sy gemaan.ONPROFESSIONELE GEDRAGHaar waarskuwing volg op kommer wat sy vroeër geopper het oor dokters wat laat by openbare gesondheidsgeriewe opdaag en voor die einde van hul werksure vertrek.Luvindao het onlangs aan die parlement gesê die ministerie gaan ’n biometriese bywoningsisteem by sekere hospitale van stapel stuur ná klagtes uit gemeenskappe oor dokters se gebrek aan stiptelikheid terwyl pasiënte in lang rye wag en spesialiste wat staatsgeriewe vir die privaat praktyk verlaat.Sy het gesê die stelsel sal die ministerie in staat stel om te monitor wanneer personeel vir diens aanmeld en vertrek.DUISENDE AFHANKLIKESDie kliniek bedien ’n aansienlike aantal pasiënte. Tussen Januarie en September vanjaar het dit 13 894 konsultasies met buitepasiënte, 75 besoeke vir voorgeboortesorg, 245 vir gesinsbeplannings en 390 vir inenting aangeteken. Ses babas is ook onder noodomstandighede gebore.“Dit is nie net syfers op ’n bladsy nie; dit is lewens wat geraak, beskerm en gered is,” het Luvindao gesê.Die kliniek bedien ’n geraamde bevolking van meer as 5 000 mense van Mabushe en 17 omliggende nedersettings.Van die kliniek se 16 goedgekeurde poste is 13 gevul, wat ’n personeelbesettingskoers van 81,3% verteenwoordig. Luvindao het gesê die kliniek het ook werksgeleenthede vir kwalifiserende plaaslike inwoners in administratiewe en ondersteuningsposte geskep.Die regering het nagenoeg N$9 miljoen in die opgradering belê.Die hoër ligging van die kliniek is bedoel om oorstromingsrisiko’s te beperk en ’n veiliger omgewing vir pasiënte en gesondheidsorgwerkers te bied.– eliot@nmh-hub.com.na

Luvindao berispe laks laatskommers

Kommentaar

Republikein 2026-11-13

Meld asseblief aan om kommentaar te lewer

Luvindao berispe laks laatskommers

Kommentaar

Republikein 2026-11-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.