Hupstoot vir stryd teen kanker

Agter elke kankerdiagnose is daar ’n mens, ’n familie en ’n gemeenskap wat een van die grootste uitdagings van die lewe trotseer. In die lig van kankergevalle in Namibië wat jaarliks met sowat 12% toeneem en ‘n gebaar van solidariteit en ondersteuning, het die Ohlthaver & List-groep (O&L) N$500 000 aan die Dr AB May Kankersorgsentrum by die Windhoek Sentrale Hospitaal oorhandig. Die skenking is bedoel om kankersifting, die ondersteuning van pasiënte en ook inisiatiewe vir bewusmaking te versterk. Die skenking is ‘n dag voor Wêreldkankerdag wat vandag herdenk word, deur O&L se hoof finansiële beampte Theresa Weitz aan die minister van gesondheid en maatskaplike dienste, dr. Esperance Luvindao, oorhandig. 

Weitz het die skenking beskryf as ‘n weerspieëling van O&L se verbintenis tot opregte, sorgsame vennootskappe met werklike en meetbare impak. Weitz sê die bydrae is deel van O&L se samewerking met die regering en ander rolspelers in gesondheid om dienslewering te versterk en lewens te verbeter.

Dr. Luvindao het as minister die groep en die breër private sektor bedank en beklemtoon dat die skenking meer as net ’n geldelike bydrae is. 

“Dit gaan nie net oor syfers nie, dit gaan oor wat dit simboliseer,” het sy gesê. Sy het ander besigheidsvennote uitgedaag om ook verantwoordelikheid te neem en het beklemtoon dat die stryd teen kanker nie die ministerie se taak alleen is nie.

Die minister het verder beklemtoon dat die bekamping van kanker ’n nasionale prioriteit is wat gesamentlike optrede vereis. Sy het gewys op Afrika se buitensporige aantal kankersterftes weens beperkte toegang tot vroeë diagnose en behandeling. Luvindao het Namibiërs aangemoedig om waninligting te vermy en gereelde siftings te prioritiseer. Gesondheidswerkers is deur haar geloof as “die sterkste krygers”, terwyl sy die skenking amptelik aanvaar en die ministerie se verbintenis tot beter sorg vir kankerpasiënte herbevestig het.

O&L se bydrae kom midde van verskerpte pogings in Namibië om kanker op verskeie fronte te beveg. In 2024 het meer as 2 210 vroue toegang tot nasionale siftingsprogramme gehad, terwyl die eerste Internasionale Kankergenomika-konferensie in September 2025 in Windhoek gehou is. Die konferensie het kundiges van die Wêreldgesondheidsorganisasie (WHO) en plaaslike navorsers byeengebring om diagnose en behandeling te bevorder. Groot fondsinsamelingsinisiatiewe, soos die Bank Windhoek Cancer Apple-projek en die Rough n Tough Rally, getuig verder van sterk gemeenskapsbetrokkenheid by infrastruktuur vir kankersorg.

Na raming sal sowat 4 000 Namibiërs vanjaar ’n kankerdiagnose ontvang. Met kankergevalle wat jaarliks met 12% styg en vroeë opsporing wat lewens kan red, word skenkings soos dié van O&L beskou as noodsaaklike hulpmiddels in die land se voortgesette stryd teen kanker. - [email protected]