Hupstoot vir gesondheidsorg in Suide

Gesondheidsorg in die suide van die land het ’n reusehupstoot gekry met ’n nuwe CT-skanderingsmasjien en noodeenheid wat by die distrikshospitaal op Keetmanshoop in gebruik geneem is. Die belegging van N$7 miljoen verteenwoordig ’n beduidende stap in die verbetering van toegang tot gevorderde gesondheidsdienste. Die geriewe is op 26 Oktober amptelik deur die minister van gesondheid en maatskaplike dienste, dr. Esperance Luvindao, geopen wat sê die ontwikkeling sal die hospitaal se rol as ’n verwysingsentrum in die ||Kharasstreek versterk. Volgens Luvindao bedien die distrikshospitaal meer as 216 000 mense met intensiewe sorg, spesialisdienste, ’n moderne noodgevalle-eenheid en nou ook gevorderde diagnostiese dienste. Die minister het gesê die nuwe geriewe weerspieël die regering se verbintenis om billike, tydige en gehalte-gesondheidsorg nader aan gemeenskappe te bring. Luvindao het beklemtoon moderne diagnostiese toerusting moet deur ’n doeltreffende noodreaksiediens ondersteun word. “Die noodgevalle-eenheid is die voordeur van enige hospitaal. Dit is ’n plek waar elke minuut tel – of dit nou gaan om ’n slagoffer van ’n padongeluk, of ’n ma wat in die middel van die nag met ’n kritiek siek kind opdaag. “Pasiënte kom hier aan in kwesbare toestande, en hulle verdien ’n fasiliteit wat vinnig reageer, veilig, skoon en waardig is, en wat geskik is vir sy doel. Daarom het ons belê in die omvattende opknapping van hierdie noodsaaklike eenheid,” het sy gesê. Volgens Luvindao bied dit nou aan dokters en verpleegkundiges ’n moderne, goed-toegeruste omgewing om pasiënte te ontvang, te evalueer, te stabiliseer en vinnig te behandel.Die minister het gesê 415 pasiënte uit die ǁKharasstreek is die afgelope jaar vir CT-skanderings verwys. Dit sluit beide noodgevalle en nie-noodgevalle in. “Vir baie jare moes pasiënte in die ǁKharasstreek wat ’n CT-skandering benodig het, lang afstande aflê – dikwels na Windhoek, sowat 500 km ver. Daardie reise het sy tol in terme van tyd, geld en gesondheid geëis. “Diagnoses is vertraag, gesinne het geld wat hulle skaars kon bekostig aan vervoer en verblyf bestee en verwysingshospitale het onder bykomende druk deurgeloop. “Vir ’n pasiënt met ’n kopbesering, ’n vermoedelike beroerte of ernstige trauma, is daardie ure van kritieke belang,” het Luvindao gesê.Die nuwe CT-skandeerder sal na verwagting pasiënte uit beide die ǁKharas- en Hardapstreek bedien. Die ǁKharasstreek se bevolking word op 109 893 inwoners beraam, terwyl die Hardapstreek ’n bevolking van 106 680 het. Saam verteenwoordig dit ’n bevolking van 216 573 Namibiërs wat nou in die suide van Namibië en nader aan hul huise en gesinne, toegang tot CT-skanderings kan kry. Volgens Luvindao voer opgeleide radiografiste reeds noodskanderings uit en sal die diens die diagnose en hantering van trauma, beroertes, kanker, neurologiese toestande en ander komplekse siektes – wat tydige en akkurate ondersoeke vereis – verbeter. “’n Dokter wat duidelik kan sien wat fout is, kan beslissend optree en ’n pasiënt wat vroeg behandel word, het ’n beter kans op herstel,” het sy gesê.Luvindao het ook verwys na opgraderings en uitbreidings by die distrikshospitaal wat die ontwikkeling van spesialisdienste insluit. Die hospitaal beskik nou oor spesialiste in verskeie hoofkliniese dissiplines, waaronder algemene chirurgie, narkose, interne geneeskunde, kindergeneeskunde, urologie, nefrologie en ortopedie. Dit beskik ook oor ’n intensiewesorgeenheid met 13 beddens vir kritiek siek pasiënte, asook ’n dialise-eenheid met vyf beddens vir mense met nierversaking.Luvindao het gesê pasiënte ontvang gemiddeld 20 dialisesessies per maand. ’n Radioloog sal ook binnekort by die hospitaal se mediese span aansluit, wat die weg baan vir CT-skanderings wat nie noodgevalle is nie. “Dit sal verseker dat ’n breër spektrum pasiënte – nie net diegene wat dringende ondersoeke benodig nie – toegang tot hierdie dienste op Keetmanshoop kan kry,” het sy gesê.Luvindao het gesondheidswerkers bedank vir hul voortgesette diens en hulle aangemoedig om pasiënte met deernis te behandel en om die nuwe geriewe te beskerm en in stand te hou. – otis@nmh-hub.com.na

Hupstoot vir gesondheidsorg in Suide

Kommentaar

Republikein 2026-10-29

Meld asseblief aan om kommentaar te lewer

Hupstoot vir gesondheidsorg in Suide

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.