Hulp daal wêreldwyd

Regerings in Oos- en Suider-Afrika is aangespoor om seksuele en reproduktiewe gesondheid en regte (SRHR) in nasionale begrotings te prioritiseer en die doeltreffendheid van openbare besteding te verbeter. Die versoek kom midde dalende buitelandse hulp en stygende skuldverpligtinge wat toenemende druk op gesondheidstelsels plaas.Erika Goldson, verteenwoordiger van die Verenigde Nasies se Bevolkingsfonds (UNFPA) in Namibië, het tydens die opening van ’n streekkonsultasie oor volhoubare finansiering vir SRHR in Windhoek verwys na amptelike ontwikkelingshulp (ODA) wat met 23,1% in reële terme daal. Dit is die grootste jaarlikse vermindering ooit en dui ’n tweede agtereenvolgende jaar van afname aan. “Terselfdertyd maak die diens van soewereine skuld oraloor Afrika ’n groter deel as gesondheid van die regering se inkomste uit,” het sy gesê.Volgens Goldson beloop die mediaan gesondheidsuitgawes van plaaslike regerings in Oos- en Suider-Afrika slegs 6% van die nasionale besteding. Dit is minder as die helfte van die 15%-teiken wat onder die Abuja-verklaring gestel is.Ten spyte van krimpende begrotings, bly die vraag na noodsaaklike moedergesondheidsorg, moderne voorbehoedmiddels, adolessente gesondheidsdienste en reaksies op geslagsgebaseerde geweld (GBV) toeneem.“Demografiese vraag krimp nie met begrotings nie,” het Goldson gewaarsku. Volgens haar sal die verhoging van gesondheidsbegrotings alleen nie die uitdagings van finansiering kan takel waarmee die streek te kampe het. Goldson het gemaan regerings sal ook moet verbeter hoe hulpbronne toegeken en bestee word.Sy het ’n beroep op ministeries van gesondheid gedoen om doelbewus SRHR in nasionale gesondheidstrategieë, noodsaaklike voordeelpakkette en tesourievoorleggings te prioritiseer. Dit sluit die vestiging van toegewyde begrotingskodes vir reproduktiewe gesondheidsdienste en -produkte in.Goldson het kommer uitgespreek oor swak begrotingsuitvoering, met verwysing na lae absorpsiekoerse, onvoorspelbare tesourieuitbetalings en vertragings met verkrygings wat verhoed dat toegekende hulpbronne primêre gesondheidsorggeriewe bereik.“’n Begrotingstoekenning op papier wat nie die primêre gesondheidsorggeriewe bereik nie, red geen lewens nie,” het sy gesê.Namibië se adjunkminister van gesondheid en maatskaplike dienste, Susan Ndjaleka, het op haar beurt gesê SRHR is ’n ekonomiese belegging wat menslike kapitaalontwikkeling ondersteun en primêre gesondheidsorg en universele gesondheidsdekking versterk.VEILIGHEIDSNETNdjaleka het gesê groot skenkerbefondsing ervaar ’n skerp verskuiwing en daar kan nie meer op eksterne hulp as die primêre veiligheidsnet vir wesentlike gesondheidsorg staatgemaak word nie.“Ons het by ’n historiese kruispad vir wêreldgesondheid en menslike ontwikkeling gekom. Volhoubare finansiering vir SRGR is nie meer net ’n teoretiese beleidsdebat nie. Dit is ’n dringende noodsaaklikheid vir gesondheidsekuriteit,” het Ndjaleka gesê. Volgens haar vorm gesinsbeplanning, gesondheidsorg vir moeders, dienste vir adolessente en jongmense, sowel as ingrypings teen GBV, die kern van maatskaplike en ekonomiese veerkragtigheid. – tuyeimo@nmh-hub.com.na

Hulp daal wêreldwyd

Kommentaar

Republikein 2026-11-13

Meld asseblief aan om kommentaar te lewer

Hulp daal wêreldwyd

Kommentaar

Republikein 2026-11-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.