Honderde leerlingmedici sonder heenkome by staat

Meer as 500 gegradueerdes in die mediese bedryf gaan teen die einde van die jaar hulself moontlik in ’n benarde posisie bevind. Die vooruitsigte is dat daar nie vir hulle ‘n enkele gesondheidsinrigting is om hul internskappe te doen om uiteindelik by die Raad van Gesondheidsberoepe in Namibië (HPCNA) te registreer nie.Die minister van gesondheid en maatskaplike dienste, dr. Kalumbi Shangula, het vroeër erken dié groep het die afgelope twee jaar “verby die kapasiteit van die geakkrediteerde gesondheidsgeriewe gegroei” wat ironies genoeg ‘n ernstige tekort aan menslike hulpbronne ondervind.Byna 200 gegradueerdes wat tans in die mediese bedryf gekwalifiseer het, is nog nie na geakkrediteerde gesondheidsinrigtings uitgeplaas nie. Die 198 gegradueerdes sluit 104 leerlingdokters, 86 aptekers, vyf fisioterapeute en drie tandartse in. Dit is uitgesluit die sowat 327 studente in verskillende gesondheidsdissiplines wat na verwagting deur die loop van vanjaar in Namibië en ook ander lande hul studies voltooi en met hul internskappe moet begin. Volgens die uitvoerende direkteur in die ministerie, mnr. Ben Nangombe, was dit die syfers teen 1 Maart vanjaar, maar is dié syfer “dinamies” omdat sommige tans uitgeplaas is en ander gradueer. Vir leerlingdokters is daar tans plek vir 330 in geakkrediteerde geriewe, 294 is reeds uitgeplaas, 104 wag nog en teen die einde van die jaar word verwag 222 studente gaan hul mediese studies voltooi. Tans is 42 leerlingtandartse uitgeplaas, terwyl 85 einde vanjaar graad vang, twee fisioterapeute het plek, terwyl nog tien hul studies die jaar voltooi, terwyl drie leerlingsielkundiges tans met hul internskap besig is. Hy sê die ministerie het ‘n omvattende plan ontwikkel om die kapasiteit vir internskappe uit te brei. Deel van die plan is om ten minste 192 senior professionele personeel (spesialiste, mediese beamptes, tandartse, aptekers en fisio- en arbeidsterapeute) te werf wat die betrokke student sal mentor. Ook moet die ministerie bykomende mediese toerusting aankoop en die infrastruktuur van gesondheidsgeriewe uitbrei om die kapasiteit vir internskappe te verhoog. Nangombe sê ses hospitale is vir akkreditasie geïdentifiseer om opleidingshospitale te word wat internskappe vir leerlingdokters kan aanbied. Drie nuwe geriewe is ook geïdentifiseer vir internskappe vir aptekers en tandartse.“Vir aptekers beplan die ministerie ook om die private sektor aan boord te bring om ten minste 74 leerlingaptekers by geriewe in te neem,” het hy gesê.By die Oshakati-staatshospitaal word beplan om 16 leerlingdokters in te neem wanneer die hospitaal akkreditasie ontvang, asook 12 leerlingdokters en ses aptekers by die Katima-hospitaal, 33 dokters en een apteker by Keetmanshoop, nege dokters by die Otjiwarongo-distrikshospitaal, Walvisbaai/Swakopmund 30 dokters, Engela-distrikshospitaal twee leerlingtandartse en nege dokters, Lüderitz-hospitaal een apteker, Ondangwa-gesondheidsentrum twee tandartse en dan 74 leerlingaptekers wat in die private sektor uitgeplaas moet word. Volgens Nangombe sal die kapasiteit vir internskappe by bestaande opleidingshospitale verhoog word. Dit sluit kapasiteit vir leerlingdokters wat by die Windhoek Sentrale Hospitaal asook die Katutura-, Onandjokwe en Oshakati-staatshospitaal met 30 elk verhoog word. Tans is die huidige geakkrediteerde gesondheidsgeriewe vir internskappe soos volg: Katutura (mediese beamptes, aptekers, tandartse), Windhoek Sentrale Hospitaal (mediese beamptes, sielkundiges, fisio- en arbeidsterapeute), Onandjokwe (mediese beamptes, tandartse), Rundu (aptekers, tandartse) en Oshakati (mediese beamptes, aptekers, tandartse, fisioterapeute)Hy sê die doel van die bykomende kapasiteit is om meer internskappe te fasiliteer. “Die beplande werwing van senior gesondheidslui om as toesighouers op te tree en die verhoogde kapasiteit vir beide nuwe en bestaande hospitale is juis om die huidige uitdagings te takel.” Dit sluit in dat die openbare gesondheidsektor deur ‘n gebrek aan menslike hulpbronne geteister word, terwyl honderde gegradueerdes weens ‘n gebrek aan kapasiteit nie uitgeplaas kan word nie. Nangombe sê sommige van dié gegradueerdes is wel op ‘n tydelike basis as deel van die ministerie se reaksie teen die Covid-19-pandemie aangestel. “Ek sal nie sê ‘gebruik’ nie, maar eerder ontplooi. Ons glo dié geleentheid om te dien help ook gegradueerdes om hul vaardighede te slyp en om op hoogte te bly, eerder as wat hulle by die huis bly en wag om met jou internskap te begin.”Hy het erken nie al die geriewe het voldoende verblyfsgeriewe vir dié wat internskappe moet voltooi nie.“Dit word voorsien volgens die beskikbaarheid daarvan.” - henriette@republikein.com.na

Honderde leerlingmedici sonder heenkome by staat

Kommentaar

Republikein 2025-05-01

Meld asseblief aan om kommentaar te lewer

Honderde leerlingmedici sonder heenkome by staat

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie