Gestremde 'nie hospitaal se verantwoordelikheid'

“Jou kind is gestremd en nie die hospitaal se verantwoordelikheid nie, jy moet hom versorg. Daar is nie plek vir hom nie.”

Dit was die naweekpersoneel by die ongevalle-afdeling van die Katutura-hospitaal in Windhoek se herhaalde woorde aan ’n desperate ma wie se seun per ambulans ingebring is, nadat hy bloed opgebring het en ’n hoë koors gehad het.

Teen Sondag het hy reeds vir etlike ure in sy bloederige braaksel gelê, met ’n drip wat vroeër opgesit is, wat glo nooit “oopgedraai” is nie.

Die 21-jarige Shelldou Daries het ernstige breinbeserings verlede jaar in September opgedoen, nadat hy na bewering vir ure in ’n huis aangehou en herhaaldelik aangerand is. Na bewering is ’n T-hemp oor sy kop getrek en op sy kop gespring. Die verdagtes is tans uit op borgtog.

Shelldou was ná die aanranding in ’n koma en aan lewensondersteunende masjiene gekoppel. Hy moes ook ’n noodoperasie van etlike ure ondergaan. Shelldou was vir drie maande in die intensiewesorgeenheid, het voeding deur ’n voedingspyp ontvang en is later na ’n gewone saal oorgeplaas. Die voedingspyp is intussen verwyder en hy is in die sorg van sy ma, Joanie Daries, ontslaan.

’n Emosionele Joanie het tydens ’n onderhoud met Republikein gesê haar seun, wat doeke dra en net spesiale melk kan drink, was vir ’n week in haar sorg toe hy Donderdag koorsig raak en diarree en braking ontwikkel.

“Hy het sy maag en kop vasgehou,” vertel Joanie wat hom per ambulans na die ongevalle-afdeling gebring het.

Die diagnose van personeel was volgens haar dat haar seun “niks makeer nie” en dat daar nie plek is om hom daar te hou nie.

“Dit was ná 12 die aand. Hoe kry ek hom by die huis? Ek is werkloos en het nie vervoer nie. Ek het gevra dat hulle hom ten minste vir die nag hou, jy kan mos nie so pasiënt huis toe neem nie.”

Vrydag omstreeks 13:00 is Shelldou terug huis toe, maar teen Saterdag was hy weer koorsig, het op sy tande gebyt en gekwyl.

“Die spesiale melk wat hy kan drink, het hy opgebring en dit was bloederig.”

Teen 22:00 het ’n ambulans hom kom haal en weer terug ongevalle toe gebring, waar hy volgens Joanie vir ure in sy bloederige braaksel gelê het. ’n Drip wat vir hom opgesit het, sou ’n ander personeellid ure later aan sy ma sê “dit is nooit oopgedraai nie” en is weer verwyder.

Sondagoggend het personeel by die hospitaal glo beklemtoon hy gaan nie opgeneem word nie, want “dis nie ons verantwoordelikheid nie” en dat as gestremde “dit sy ma se verantwoordelikheid is om hom te versorg”.

Volgens Joanie het die hospitaal sedert haar seun in September verlede jaar die eerste keer opgeneem is, nog nooit die spesiale melk en ook doeke in voorraad gehad wat hy gebruik nie en moet sy dit uit haar eie sak aan die hospitaal voorsien.

Shelldou is uiteindelik Sondag deur ’n dokter opgeneem wat ook bloedtoetse laat doen het. Volgens Joanie het die uitslae gewys hy het ’n infeksie. Die dokter het ook voorgestel dat hy ’n gastroskopie kry.

Volgens Joanie het die melk wat sy Sondagaand met sy opname vir hom geneem het, met haar besoektyd gister steeds net so langs sy bed gestaan. Haar seun se doek was glo ook nie omgeruil nie. Sy moes ook noodgedwonge skoon linne van die huis bring, omdat daar glo nie by die hospitaal was nie. – [email protected]