Geen werk vir graduandi in openbare gesondheid

Werklose gegradueerdes wat in openbare gesondheid en die bestuur van gesondheidsinligtingstelsels gespesialiseer het, staar voortgesette onsekerheid oor werksgeleenthede in die openbare gesondheidsorgsektor in die gesig.Die minister van gesondheid en maatskaplike dienste, dr. Esperance Luvindao, het in die parlement bevestig die ministerie het geen goedgekeurde poste wat spesifiek vir dié gegradueerdes se kwalifikasies aangewys is nie.Luvindao se reaksie volg op ’n vraag van die Republican Party se parlementslid, Mathias Mbundu, oor waarom gekwalifiseerde gegradueerdes – van wie sommige glo reeds sedert 2019 sonder werk is – nie in die staat se gesondheidsorgstelsel opgeneem is nie.Mbundu wou weet of die ministerie van voorneme is om geleenthede vir hierdie gegradueerdes te skep om verantwoordelikheid te neem vir die bestuur van gesondheidsdata, monitering en evaluering. Dié funksies word tans deur verpleegkundiges verrig. Luvindao het verduidelik die afwesigheid van toegewyde poste en goedgekeurde administratiewe maatreëls vir personeel vir dié twee vakgebiede verhoed die ministerie om gegradueerdes direk in sodanige rolle te werf.Sy het gesê hoewel daar werklose maar gekwalifiseerde gegradueerdes in die bestuur van gesondheidsinligtingstelsels, sowel as in openbare gesondheid in die arbeidsmark beskikbaar is, hulle nie outomaties in bestaande vakante poste geabsorbeer kan word nie. “Outomatiese plasing sou in stryd wees met die administratiewe raamwerk wat werwing in die Namibiese staatsdiens reguleer, ingevolge Artikel 18 van die Namibiese Grondwet sowel as staatsdienspersoneelreël B11,” het Luvindao gesê.Die minister het gesê alle vakatures moet geadverteer word om deursigtigheid en billikheid vir alle aansoekers te verseker wat vir die poste kwalifiseer. Volgens Luvindao vereis die werwingsproses dat elke belangstellende en gekwalifiseerde aansoeker die geleentheid gebied moet word om mee te ding. Geskikte kandidate sal vervolgens geëvalueer word, waarna die finale keuse op grond van meriete gemaak sal word.“Terwyl die werkloosheidsuitdaging waarmee gegradueerdes te kampe het, wel deur die ministerie erken word, sou direkte indiensneming – soos genoem – ongelukkig teenstrydig wees met die huidige regulasies vir werwing in die staatsdiens,” het Luvindao gesê.Sy het gesê hoewel die land oor gekwalifiseerde professionele persone beskik wat werk soek, hul beskikbaarheid nie outomaties tot aanstellings in die staatsdiens sal lei nie.Luvindao het egter gewys op bestaande poste as gesondheidsprogrambeamptes binne die ministerie se strukture vir gesondheidsinligting en navorsing as ’n moontlike werksgeleentheid vir gegradueerdes wat aan die voorgeskrewe kwalifikasies voldoen. – tuyeimo@nmh-hub.com.na

Geen werk vir graduandi in openbare gesondheid

Kommentaar

Republikein 2026-10-22

Meld asseblief aan om kommentaar te lewer

Geen werk vir graduandi in openbare gesondheid

Kommentaar

Republikein 2026-10-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.