Geen riool in hospitaal, sê ministerie

Henriette Lamprecht – Geen dokters moes nog operasies in die lig van hul selfone uitvoer omdat ’n kragopwekker tydens ’n kragonderbreking by die Engela-hospitaal nie gewerk het nie. Van riool wat weens ’n stukkende pomp die hospitaal in stank hul, is daar ook nie sprake nie.Die uitvoerende direkteur van gesondheid en maatskaplike dienste, Ben Nangombe, het ’n verslag oor die stand van die hospitaal deur ’n lid van die Popular Democratic Movement (PDM) as “sensasioneel en onverantwoordelik” beskryf en sê dit is nie op feite gebaseer nie.Hidipo Hamata het vroeër die hospitaal besoek en onder meer gesê die kragopwekker werk reeds vir maande nie en flitsligte van selfone moet ingespan word wanneer die krag afgaan. Nangombe het dit ontken en sê die hospitaal het twee kragopwekkers wat op bystand is. Die een is in ’n werkende toestand, terwyl die ander een tans gediens word omdat dit tydens ’n donderstorm beskadig is. Volgens die hospitaal se bestuur moes selfone nog nooit in die teater ingespan word nie en word operasies nie geskeduleer wanneer die krag af is nie. Hamata het verwys na pasiënte wat dikwels sonder beddegoed gelaat word of op vuil linne moet slaap, omdat die hospitaal nie sy eie wasgoed was nie, want wasmasjiene is stukkend. Beddegoed word glo na die staatshospitale op Onandjokwe of Oshakati vervoer wat volgens Hamata hoë petroluitgawes vir die staat veroorsaak. Volgens Nangombe word die wasmasjiene by die hospitaal deur maatskappye in die private sektor gediens en onderhou. ’n Versoek om die wasmasjiene te herstel is reeds ingedien en die verskaffer wag vir onderdele om op te daag. Om die voortgesette was van linne intussen te verseker, word die wasgoed by die naaste gesondheidsgeriewe gewas.“Ons verseker dat geen pasiënte vuil linne in die hospitaal gebruik nie,” het hy gesê.Met verwysing na die hospitaal se rioolpomp is ’n versoek vir die vervanging hiervan by die ministerie se verkrygingseenheid ingedien. Hamata sê tydens sy besoek het die hospitaal dié van die dorpsraad gebruik. Riool het volgens hom oral gelê met ’n vreeslike stank en gesondheidsrisiko vir pasiënte, personeel en besoekers.Nangombe erken die hospitaal gebruik die Helao Nafidi-dorpsraad se pomp, maar ontken dat enige rioolverwante probleme binne die hospitaal ervaar word. Nangombe gee Hamata gelyk dat drie van die 15 kabinette in die hospitaal se ou lykshuis buitewerking is, omdat kompressors tydens ’n kragonderbreking uitgebrand het. Dié kwessie word deur die verkrygingsbestuurskomitee behartig. Hy beklemtoon die hospitaal het nog ’n aparte lykshuis waarin tot 20 liggame gehuisves kan word. Foto’s wat Hamata se verslag vergesel het, is volgens Namgombe ook nie by die hospitaal geneem nie.Hy het gemaan leiers moet ophou om ongegronde en verkeerde stellings te maak wat kan veroorsaak dat lede van die publiek eerder kies om nie ’n hospitaal of kliniek te besoek nie. Hamata sê dit is nie reg dat die hospitaal wat deur die Finse regering geskenk is, uitmekaar val sonder ordentlike instandhouding weens verwaarlosing deur die huidige regering nie. – henriette@republikein.com.na

Geen riool in hospitaal, sê ministerie

Kommentaar

Republikein 2025-06-18

Meld asseblief aan om kommentaar te lewer

Geen riool in hospitaal, sê ministerie

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie