Geen behandeling, geen antwoorde

’n Vyf maande oue babameisie se een voetjie gaan moontlik noodgedwonge geamputeer moet word.Dit nadat ’n binneaarse drup, wat vog in haar voetweefsel laat vloei het, edema veroorsaak het. Edema is swelling wat veroorsaak word deur oortollige vloeistof wat in die liggaamweefsel vasgekeer is. Die babameisie is in Maart as een van ’n tweeling in die distrikshospitaal op Swakopmund gebore en is later saam met hul ma ontslaan.Skaars ’n maand later is sy weer in April in die distrikshospitaal vir ’n loopmaag en wanvoeding opgeneem en op ’n drup gesit wat in haar voetjie geplaas is. Aangesien die drup glo nie reg ingesit is nie, het dit tot vog in haar voetweefsel gelei en so geswel dat dit stukkend geraak en sy infeksie opgedoen het. Die afgelope vier maande is dit steeds haar tydelike tuiste, omdat mediese personeel volgens haar ma glo nog nooit haar dogtertjie se voet behandel of op enige van haar klagtes gereageer het nie.Die ma wat nog drie kinders by die huis het, is die enigste broodwinner; sy kon nie werk sedert hul opname in die hospitaal nie en het haar ander kinders vier maande laas gesien.Die private maatskaplike werker en kampvegter vir kinders, Catrien du Toit van Family Mentoring Services, het van die meisietjie se lot bewus geword toe die distrikshospitaal se maatskaplike werker haar herhaaldelik vir melk en doeke gekontak het. Met haar laaste oproep wou Du Toit egter meer oor die spesifieke geval weet, omdat “dit nie die probleem oplos om net heeltyd te gee nie”. Du Toit en Namibië se ander kampvegter vir kinders, Ronel Pieters van die tydelike tuiste vir weggooibabas en kwesbare kinders, die Ruach Elohim-stigting, het die ma en haar dogtertjie by die maatskaplike werker in die hospitaal besoek om die werklike situasie vas te stel.“Albei was in ’n verskriklike vuil en verwaarloosde toestand. Volgens die ma het haar klagtes die afgelope paar maande oor die toestand van haar dogtertjie se voet op dowe ore geval en aanvaar die hospitaal ook glo geen verantwoordelikheid daarvoor nie,” het Du Toit gesê.“In vier maande is net niks daaraan gedoen nie. Die voetjie is kliphard geswel en die drukking moet verlig word. Hulle sê nie vir die ma wat aangaan nie en gee geen antwoorde nie,” sê Du Toit.Volgens haar moes die babameisie al maande terug behandel gewees het en is die oplossing nou amputasie “wat die maklikste uitweg” is.Pieters en Du Toit het die hulp van ’n private fisioterapeut ingeroep om limfdreinering te doen en ook aan die ma gewys hoe om haar dogtertjie se voetjie te masseer om te kyk of die bloedvloei nie weer terugkeer nie. Dit is egter geensins voldoende nie.’n Amputasie is ’n lewenslange kwessie, sê Du Toit.“Dit is mediese nalatigheid aan die kant van die staat wat oor en oor pasiënte faal. Die maatskaplike werker het nie eers geweet wat die vrou se naam is nie. “Geen ordentlike onderhoud is met haar gevoer om te verstaan wat werklik aangaan en wat haar omstandighede is nie. Daar is bloot net elke keer vir ’n nieregeringsorganisasie melk en doeke gevra.”Die tweeling en hul ma is na Ruach Elohim geneem waar hulle gebad en gevoed is en daarna met skoon, nuwe stelle klere, bottels en melk weer na die hospitaal geneem is.“Die ma en haar tweeling is in die hospitaal vasgekeer, sonder antwoorde oor die pad vorentoe. Dit terwyl haar ander drie kinders by die huis van ellende vergaan, omdat sy nie kan werk nie.”– henriette@republikein.com.na

Geen behandeling, geen antwoorde

Kommentaar

Republikein 2026-09-09

Meld asseblief aan om kommentaar te lewer

Geen behandeling, geen antwoorde

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.