'Geen asbes in marmerstof gevind’

Die Karibib-dorpsraad sê onafhanklike laboratoriumtoetse het geen asbesvesels in die marmerstof wat in die dorp versprei is, gevind nie,

Dit volg ná openbare kommer wat in ’n onlangse verslag geopper is waarin gesondheidsrisiko’s aan marmerafval gekoppel is.

In ’n amptelike verduideliking het die munisipaliteit gesê onafhanklike laboratoriumtoetse is in Junie 2025 op marmerstof en verwante materiaal gedoen, wat in die vroeëre verslag as marmerafval beskryf is.

Die toetse is uitgevoer deur National Environmental Health Consultants, ’n plaaslike instelling wat in asbesinspeksie en -monitering spesialiseer.

Volgens die raad het monsters wat van UWM Mineral Processing en Best Cheer Stone Group verkry is, bevestig dat geen asbesvesels in enige van die geanaliseerde materiale opgespoor is nie.

Die raad het gesê die uitslae weerspreek bewerings dat asbesvesels teenwoordig was in materiaal wat met die plekke verband hou waarna in die vroeëre verslag verwys is.

“Op grond van geloofwaardige wetenskaplike bewyse wat tans beskikbaar is, is daar geen bevestiging van asbesbesoedeling in die marmersand wat deur die raad versprei word nie,” lui die verklaring.

Karibib se uitvoerende hoof, Tangeni Enkono, het gesê die munisipaliteit het die verduideliking uitgereik in belang van feitelike akkuraatheid en openbare vertroue.

Hy het bygevoeg dat die raad beskikbaar is vir inwoners en die media om inligting rakende die saak te verifieer.

Die munisipaliteit het bygevoeg dat die marmerstof, sand of afval wat aan inwoners beskikbaar gestel word as bekostigbare bou- en landskapmateriaal, nie asbes bevat nie, volgens die geverifieerde laboratoriumbevindinge.

Die vroeëre verslag het beweer dat afval van marmermynbou- en verwerking wat asbesvesels bevat, in en om Karibib gestort is, wat vrese oor langtermyn-gesondheidsrisiko’s laat ontstaan het.

Daardie bewerings het debat binne die marmersektor ontketen, met rolspelers in die bedryf wat verdeeld is oor of die kwessie ’n werklike omgewingsbekommernis verteenwoordig of ’n kommersiële geskil is wat in die openbaar besleg word.

Klaus Rheinschmidt, vise-president van die Karibib Marmervereniging, het vroeër gewaarsku dat enige moontlike risiko afhang van hoe marmerstof hanteer word.

Hy het gesê fyn deeltjies wat deur slyp- of snywerk ontstaan, gevaarlik kan word as dit in die lug beland en beklemtoon dat voorsorgmaatreëls belangrik bly, asook om behoorlik daarvan ontslae te raak.

Franz Wittreich, hoof uitvoerende beampte van Namibia Marble and Granite (NAMAGRA), het herhaal dat sy maatskappy se marmer uitgebreide toetsing ondergaan het.

Hy het ’n fisiese toetsverslag aan Network Media Hub (NMH) verskaf wat die afwesigheid van asbesvesels bevestig. Hy het bygevoeg dat hy net oor die materiaal kan praat wat sy maatskappy ontgin en verwerk.

“NAMAGRA ontgin Namibia White Rhino Marble en ons het allerhande toetse gedoen soos deur internasionale standaarde vereis.

“As sodanig kan ons bewys dat ons marmer geen asbesvesels het nie. Ons materiaal en produkte is skoon en veilig vir jou huis, tuin, diere en openbare plekke,” het Wittreich gesê.

Hy het bygevoeg dat deursigtigheid oor toetsing belangrik is om te voorkom dat alle marmerprodusente en hul produkte oor een kam geskeer word.

’n Bestuurder van Best Cheer Stone Group het vroeër bewerings van wangedrag verwerp en gesê die maatskappy werk in ooreenstemming met regeringsvereistes. Hy het die bewerings as kommersieel gemotiveerde mededinging binne die sektor beskryf.

Die Karibib-dorpsraad het gesê hy respekteer die rol van die media en belanghebbendes om openbare bekommernisse onder die aandag te bring, maar het betrokkenheid met die munisipaliteit aangemoedig wanneer sake rakende openbare gesondheid ontstaan.

– [email protected]