Fabupharm: Onttrekking van medikasie vererger druk op staatshospitale, klinieke

Die onttrekking van alle vloeibare medikasie wat deur Fabupharm Namibia (Pty) Ltd. vervaardig word aan staatshospitale en klinieke oraloor in Namibië het die land se gesondheidsorgstelsel ’n gevoelige knou toegedien.Die onttrekking volg ná ’n opdrag van die ministerie van gesondheid en maatskaplike dienste, nadat die farmaseutiese vervaardiger na bewering sedert Januarie vanjaar sonder ’n geldige produksielisensie bedryf is. Hospitale en kliniek oraloor die land is opdrag gegee om die geraakte produkte te isoleer en as “nie vir gebruik” te merk. Die gesondheidsinstellings moet ook voorradelyste van alle voorraad wat gekwarantyn is binne 48 uur aan streekaptekers stuur. Dié opdrag volg nadat die Namibiese Medisynebeheerraad (NMRC) Fabupharm se produksielyn vir vloeistowwe opgeskort het met verwysing na ernstige foute in kwaliteitbeheer wat tydens ’n onlangse inspeksie waargeneem is.Hoewel die NMRC daarop aandring dat die opskorting noodsaaklik is om openbare gesondheid te beskerm, het die besluit wydverspreide kritiek ontlok. Die grootste kritiek is van die Namibiese Verpleegunie (Nanu) wat ’n hewige aanval op die reguleerder se kredietwaardigheid en vermoë geloods het. In ’n sterk bewoorde verklaring wat gister uitgereik is, het Nanu met “diepe kommer en absolute walging” van wat die vakbond beskryf as die “growwe oortredings” van die wet op die beheer van medisyne en verwante middele deur die NMRC verwys.Die vakbond het die regulerende liggaam daarvan beskuldig dat dit die goedkeuring en sirkulering van ongeregistreerde medisyne toelaat en farmaseutiese maatskappye in staat stel om sonder die vereiste lisensies te funksioneer. “Hierdie optrede is ’n ernstige oortreding van die wet en professionele etiek en het die lewens en welstand van Namibiërs in ernstige gevaar gestel,” het die sekretaris-generaal van Nanu, Junias Shilunga gesê.Volgens hom is die openbare vertroue in die land se gesondheidsinstellings “aansienlik afgebreek” deur wat hy beskryf het as ’n klimaat van sistemiese korrupsie, straffeloosheid en verontagsaming van mense se lewens. Nanu het gevra vir die onmiddellike ontbinding van die NMRC, tesame met ’n volle forensiese oudit van sy werksaamhede. Die unie het ook ’n beroep op president Netumbo Nandi-Ndaitwah gedoen om ’n presidensiële kommissie van ondersoek van stapel te stuur na die werksaamhede van die gesondheidsministerie. Volgens Nanu moet die kommissie gelei word deur ’n senior, onafhanklike regter en verteenwoordiging insluit van vakbonde in die gesondheidsektor om onpartydigheid en deursigtigheid te verseker. Die krisis het ook ernstige vrae laat ontstaan oor openbare verkrygingspraktyke. Fabupharm is bestempel as ’n sleutel- plaaslike verskaffer van noodsaaklike medikasie en die sentrale verkrygingsraad het in Februarie 2023 ’n mediese tender van N$458 miljoen aan Fabupharm toegeken. Die raad het die toekenning van die tender toe verdedig en gesê Fabupharm het ’n geldige lisensie. Fabupharm het nog nie amptelik op die aantygings teen hom gereageer nie. Die feit dat die vervaardiger na bewering nie aan regulasies vir vervaardiging voldoen het nie, ten spyte van regeringskontrakte, het nou ’n lang skadu oor beide sy geloofwaardigheid en die van die regulerings- en verkrygingstelsels gewerp wat ten doel het om dit te beheer. Die ministerie se uitvoerende direkteur, Penda Iithindi, kon gister nie bevestig of sy ministerie geld aan Fabupharm vir die verskaffing van medikasie skuld nie en indien wel, dié betalings wel in die lig van die beweerde oortredings gemaak sal word. “Ons kan nie belastingbetalers se geld op onwettige handel bestee nie,” het hy by navrae gesê sonder om enige verdere besonderhede te verskaf. Nanu se beskuldigings teen die NMRC is tot op hede deur stilte aan die kant van die beheerraad begroet wat ook moet verduidelik waarom Fabupharm toegelaat is om vir byna ses maande voort te gaan om vloeibare medikasie te vervaardig en te versprei sonder die wettig vereiste goedkeuring. Die onttrekking van die betrokke Fabupharm-produkte uit openbare gesondheidsgeriewe sal na verwagting die bestaande druk op die staat se gesondheidsgeriewe vererger wat reeds deur erge medisynetekorte geraak word. Nanu het beklemtoon dat die lewens van Namibiërs nie op die altaar van korrupsie en onvermoë geoffer moet word nie. – republikein@republikein.com.na

Fabupharm: Onttrekking van medikasie vererger druk op staatshospitale, klinieke

Kommentaar

Republikein 2026-01-29

Meld asseblief aan om kommentaar te lewer

Fabupharm: Onttrekking van medikasie vererger druk op staatshospitale, klinieke

Kommentaar

Republikein 2026-01-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.