Ernstige medisynetekorte op Engela

Die Engela-distrikshospitaal in die Ohangwenastreek worstel met ’n ernstige tekort aan noodsaaklike medikasie, wat pasiënte met ernstige toestande – insluitend hoë bloeddruk – sonder voldoende behandeling laat.

Dr. Lukas Nghaamwa, die senior mediese beampte by die hospitaal, het aan Republikein gesê die distrikshospitaal is genoodsaak om sy eie fondse te gebruik om oogdruppels en ’n beperkte voorraad medikasie aan te koop. Nghaamwa het egter gewaarsku dié voorraad sal binnekort uitgeput wees.

“Die situasie is ernstig en ons weet dikwels nie hoe om ons pasiënte te behandel nie. 

“Onmiddellike ingryping is nodig om hierdie probleem op te los sodat ons doeltreffende sorg met die gepaste medikasie kan lewer, veral vir diegene met hoë bloeddruk,” het Nghaamwa gemaan. 

Hy het ’n dringende beroep op die ministerie van gesondheid en maatskaplike dienste gedoen vir spoedige optrede en die onmiddellike voorsiening van noodsaaklike medisyne.

Die tekorte is ook tydens die besoek van die goewerneur van Ohangwena, Kadiva Hamutumwa, aan die hospitaal in Junie vanjaar uitgelig.

Tydens die besoek het dit aan die lig gekom dat verwagtende vroue in ’n tydelike skuiling op beddens sonder enige matrasse geslaap het. Sy het die hospitaalbestuur opdrag gegee om sonder versuim matrasse aan te koop en beklemtoon dat sy nie wou sien dat enige pasiënt sonder ’n matras is nie.

Nghaamwa het bevestig die kwessie is intussen opgelos nadat die distrikshospitaal van matrasse voorsien is, insluitend ’n skenking van Sanlam.

“In 2024 het Sanlam 100 matrasse spesifiek vir verwagtende ma’s geskenk. Die vroue wat sonder matrasse in die skuiling was, was nie veronderstel om daar te wees nie, maar weens ’n tekort aan ruimte het ons hulle van matrasse voorsien. 

“Daar is tans geen pasiënte of verwagtende ma’s wat op die vloer of op beddens sonder ’n matras slaap nie,” het hy gesê.

Die distrikshospitaal het ook 200 nuwe matrasse uit Windhoek aangekoop wat nog afgelewer moet word. 

Hoewel oorvol hospitaalsale soms tot kortstondige tekorte aan beddens en matrasse lei, het Nghaamwa dit as ongewoon beskryf. – [email protected]