Een distrikshospitaal vir meer as 140 000 inwoners

Die Zambezistreek het weer eens gepleit vir die opgradering van die Katima Mulilo-distrikshospitaal na ’n intermediëre hospitaal weens die voortgesette lewensverlies tydens die noodoorplasings van pasiënte na hospitale op Rundu en Windhoek. Dié streek se nuut aangestelde goewerneur, Dorothy Kabula, het onlangs tydens haar streekrede gesê ten spyte van merkbare verbeterings by dié staatshospitaal, is daar steeds ’n kritieke gaping in die lewering van gesondheidsdienste. “Vooruitgang by die Katima Mulilo-hospitaal is noemenswaardig, maar ons doen steeds ’n beroep op die ministerie van gesondheid en maatskaplike dienste om die hospitaal na intermediêre vlak op te gradeer, aangesien talle lewensverliese plaasvind in die proses om pasiënte [na ander hospitale] oor te plaas,” het Kabula gesê.Die hospitaal is tans die enigste geriewe op distriksvlak wat ’n bevolking van meer as 142 000 moet bedien. Dit word ondersteun deur drie gesondheidsorgsentrums, 27 klinieke en 51 uitreikpunt. In die afwesigheid van dienste op intermediêre vlak kan die hospitaal egter nie ingewikkelde mediese gevalle hanteer nie, wat dikwels lang en duur verwysings vereis.Ten spyte van dié uitdaging, het die streek vooruitgang getoon met betrekking tot gesondheidsinfrastruktuur, insluitend die konstruksie van ’n nuwe tandheelkundige eenheid by die hospitaal op Katima Mulilo teen ’n koste van N$9,6 miljoen. Dié geriewe is tans 7% voltooi. Bykomend is ’n dialise-eenheid by die hospitaal ook gevestig en word daar tans gewag op die installering van gespesialiseerde toerusting. Die Linyanti Primêre Gesondheidsgeriewe (PHC) is ook opgegradeer, saam met die Malangalenga-kliniek. Die Isiza PHC is ook opgeknap, ten spyte van vertragings wat die projek weens probleme met die kontrakteur ervaar het.Ander geriewe wat voltooiing nader, sluit in die Tubaja- en Satchona PHC-sentrums, terwyl die Muzi PHC-projek wat vroeër onderbreek is, weer terug op koers is met tenderdokumentasie wat gefinaliseer word. Volgens Kabula is 264 gesondheidsorgposte die afgelope jaar gevul, wat insluit 188 verpleegsters en 21 mediese beamptes om dienslewering in die streek se geriewe te verbeter. “Sonder plaaslike toegang tot gevorderde sorg, staar pasiënte dikwels lang, duur en gevaarlike reise in die gesig om elders behandeling te ontvang,” het sy gemaan. – republikein@republikein.com.na

Een distrikshospitaal vir meer as 140 000 inwoners

Kommentaar

Republikein 2025-09-17

Meld asseblief aan om kommentaar te lewer

Een distrikshospitaal vir meer as 140 000 inwoners

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie