Cholera-uitbreking by Opuwo bevestig

Die minister van gesondheid en maatskaplike dienste, dr. Esperance Luvindao, het gister ’n cholera-uitbreking in die Opuwo-distrik in die Kunenestreek verklaar ná die bevestiging van plaaslik oordraagbare gevalle, insluitend die sterfte van 'n vierjarige kind.Die ministerie het bevestig ses mense – almal uit dieselfde huishouding – het die siekte opgedoen.Luviandao het gister tydens ’n mediakonferensie in Windhoek aangekondig dat die eerste twee bevestigde gevalle positief getoets het vir Vibrio cholerae 01, ’n stam wat bekend is daarvoor dat dit uitbrekings veroorsaak. Die monsters is deur die Nasionale Instituut vir Oordraagbare Siektes in Suid-Afrika getoets.Die situasie het vinnig geëskaleer nadat vier mense – drie kinders en een volwassene – by die Opuwo-staatshospitaal aangemeld het met simptome van waterige diarree en braking. Een van die kinders het aan ernstige ontwatering beswyk.AGT VERMEENDE GEVALLETeen Woensdag is agt vermeende gevalle aangemeld. Terwyl twee vermeende gevalle negatief getoets het, bly vyf individue in isolasie in die hospitaal en is in ’n stabiele toestand.Alhoewel die aantal bevestigde infeksies beperk bly, het die minister gesê dat die teenwoordigheid van ’n enkele plaaslik oordraagbare geval aan die Wêreldgesondheidsorganisasie (WHO) se drempel voldoen om ’n uitbreking te verklaar. “Hoewel die situasie nie openbare paniek regverdig nie, is dit ons gesamentlike verbintenis om die verspreiding van cholera in die geraakte gebiede te voorkom, te beperk en uit te roei,” het sy gesê.Cholera wat deur water versprei word, word dikwels aan swak sanitasie en higiëne gekoppel en die uitbreking by Opuwo beklemtoon volgehoue ongelykhede in basiese diensverskaffing, veral rakende toegang tot veilige drinkwater en sanitasie.“Cholera is nie bloot ’n gesondheidskwessie nie, dit is ’n aanduiding van ongelykheid en ’n weerspieëling van onderliggende maatskaplike ontwikkelingsuitdagings,” het Luvindao aan verteenwoordigers van die WHO, die Verenigde Nasies se Kinderfonds (Unicef) en Bevolkingsfonds (UNFPA) en die Sentrums vir Siektebeheer en -voorkoming gesê.MEDIESE SPANNE GESTUURNetwork Media Hub (NMH) het vandeesweek berig dat die kind se dood skokgolwe deur die gemeenskap gestuur het, wat nie toegang tot skoon water het nie.Die streek se kwesbaarheid vir siekte-uitbrekings word vererger deur die uitdagende terrein, beperkte infrastruktuur en ’n chroniese tekort aan gesondheidsorgbronne.Tydens die 2008-vloede het Kunene soortgelyke verwoesting ervaar toe cholera en ander wateroordraagbare siektes deur informele nedersettings versprei het. In reaksie hierop het die ministerie sy voorvalbestuurstelsel geaktiveer om ’n gekoördineerde multisektorale benadering te verseker.Volgens die ministerie is mediese spanne na die gebied gestuur om behandeling te verskaf, infeksies op te spoor en gemeenskappe te betrek.Owerhede behandel waterbronne met chloor, vestig rehidrasiepunte en rig behandelingseenhede op.BASIESE HIGIëNELuvindao het egter beklemtoon dat die beheer van die uitbreking meer as net mediese ingryping sal vereis.“Die beskerming van openbare gesondheid vereis gesamentlike pogings oor alle sektore heen,” het sy gesê en ’n beroep op godsdienstige leiers, die burgerlike samelewing en die media gedoen om te help met die verspreiding van akkurate inligting en die ondersteuning van geraakte gemeenskappe.Sy het alle Namibiërs aangespoor om basiese higiëne te beoefen, soos om hande met skoon water en seep te was, kos uit onveilige bronne te vermy en drinkwater te kook.“Soek onmiddellik mediese hulp as jy of iemand in jou huishouding waterige diarree of braking ervaar,” het sy gewaarsku.Die uitbreking dra by tot ’n groeiende lys van openbare gesondheidsnoodgevalle in onlangse jare, insluitend hepatitis E, Covid-19 en malaria.Maar dit weerspieël ook Namibië se verbeterde reaksievermoëns.“Ons ervarings met hierdie uitbrekings het ons paraatheid en reaksiemeganismes versterk,” het Luvindao gesê.– republikein@republikein.com.na

Cholera-uitbreking by Opuwo bevestig

Kommentaar

Republikein 2025-06-24

Meld asseblief aan om kommentaar te lewer

Cholera-uitbreking by Opuwo bevestig

Kommentaar

Republikein 2025-06-24

Meld asseblief aan om kommentaar te lewer

MELD AAN

Advertensie