Bou van hospitaal begin hopelik in 2027

Die konstruksie van Otjiwarongo se lank beplande verwysingshospitaal met 250 beddens sal na verwagting vroeg in 2027 begin. Dis die 13de jaar wat dié belofte gemaak word sedert die konstruksie van die hospitaal die eerste keer aangekondig is. Volgens die ministerie van gesondheid en maatskaplike dienste sal die konstruksie van die infrastruktuur na verwagting vroeg volgende jaar begin, onderhewig aan die beskikbaarheid van befondsing van die tesourie.“Die beskikbaarheid van befondsing van die tesourie is ’n belangrike aanwyser om die implementering van die projek te bespoedig,” het die ministerie se woordvoerder, Walters Kamaya, in reaksie op Republikein se vrae gesê.Die ministerie het gesê die konstruksie van die interne terreininfrastruktuur sou die grondslag vir die hoofhospitaalgebou lê. Die konstruksie sal na verwagting 36 maande duur sodra die projek begin.Die voorgestelde hospitaal is in 2014 aangekondig, terwyl beplanning in 2015 begin het. Dit het ’n omgewingsimpakstudie, vervoerimpakstudie, geotegniese opname en hospitaalontwerpe ingesluit.Die bouprojek is aanvanklik deur die ekonomiese afswaai in 2016 beïnvloed, wat volgens die ministerie tot ’n afname in die konstruksiebedryf bygedra het. Die Covid-19-pandemie het daarna ook tot verdere vertragings gelei.Volgens Kamaya is die projek steeds deel van die ministrie se algehele agenda vir gesondheidsontwikkeling. Dit val buite die staatsinkomstefonds met toekennings vir die projek wat ingevolge die mediumtermyn-uitgaweraamwerk vir die 2026-’27- tot 2028-’29-boekjaar gemaak is. Die Kamaya het egter nie die bedrag wat aan die projek toegeken is onder die huidige raamwerk of ’n bevestigde datum vir die aanvang van konstruksie verskaf nie. Volgens hom het die ministerie reeds N$12,6 miljoen aan komponente van die projek bestee. Die grond vir die hospitaal is teen ’n koste van N$5 miljoen verseker, terwyl die skoonmaak van die terrein en omheinings teen N$7,6 miljoen voltooi is.Volgens die ministerie sluit die projek verblyf vir personeel, ’n konferensiesentrum, diensgeboue vir funksies soos ’n wassery, lykshuis en kombuisdienste, ’n administrasiegebou, die hoofhospitaal, mediese nooddienste en ondersteunende infrastruktuur in.Die ondersteunende infrastruktuur sluit paaie, water-, riool- en elektrisiteitsdienste, watertenks, ’n waterbehandelingsaanleg, huisies vir hekwagte en tuindienste in. Die hoofgebou en dié van die nooddienste word tans hersien, met inagneming van die tyd wat reeds verloop het sedert die projek beplan is. Die ministerie se beraming van konstruksiekoste is in 2016 op N$945,5 miljoen beraam. Tydens Republikein se besoek verlede week aan die terrein van die beoogde hospitaal, was daar net ’n betonstruktuur wat die gebied omhein het, terwyl die res toegegroei was, sonder enige sigbare teken van fondasies of konstruksiebedrywighede. Die projek was voorheen geskeduleer vir voltooiing teen Maart 2026.Die voorgestelde geriewe is bedoel om verwysingsdienste in die streek te versterk en druk op bestaande gesondheidsgeriewe te verminder. Die behoefte aan ’n verwysingshospitaal op Otjiwarongo is ook in vorige jare deur streekleierskap geopper. – phillipus@nmh-hub.com.na

Bou van hospitaal begin hopelik in 2027

Kommentaar

Republikein 2026-09-09

Meld asseblief aan om kommentaar te lewer

Bou van hospitaal begin hopelik in 2027

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.