Besnydenis kan MIV verhoed

Norich Uararakana Kaurika (44) voer besnydenisse in sy gemeenskap in Okakarara in die Otjozondjupastreek uit. Volgens Norich se Ovaherero-tradisie moet elke jong man nie net as deel van ’n inisiasieproses besny word nie, maar ook om infeksies te voorkom en higiëne te verbeter. Norich sê die tradisionele rol van die groep seuns wat in dieselfde jaar besny is, is om mekaar te ondersteun.“In moeilike tye word die mans in die groep mekaar se steunpilare. Hulle hou mekaar verantwoordbaar in onder meer hul huwelike en ander uitdagings wat die mans op hul lewenspad mag ervaar,” het hy verduidelik. Die voorkomskoers van inwoners van die streek wat met MIV leef, staan op 8,45% en Otjozondjupa is een van 12 prioriteitsgebiede vir Namibië se vrywillige mediese besnydenisprogram (VMMC) ter ondersteuning van die ministerie van gesondheid en maatskaplike dienste se reaksie tot die MIV-pandemie. Navorsing wys manlike besnydenis verminder die oordrag van MIV in mans met 60% en dit is ’n belangrike voorkomingsmaatreël wanneer dit saam met ander benaderings gebruik word. Die ministerie is in vennootskap met die Amerikaanse regering se program vir die opskerp van VMMC-aktiwiteite om 80% van die Namibiese bevolking vanaf 15 jaar en ouer te besny. Die program word gefinansier deur die president se noodplan vir vigsverligting (Pepfar) deur die Amerikaanse Agentskap vir Internasionale Ontwikkeling (USAID) en word deur Abt Associates geïmplementeer. Die mobilisering van gemeenskappe en interpersoonlike kommunikasie is noodsaaklik om inwoners bewus te maak van en die VMMC-dienste te verstaan. Dit sluit in die werwing van gemeenskapsmobiliseerders met die hulp van plaaslike raadslede. Voordat hy die SAFE VMMC-opleiding ontvang het, was Norich nie bewus van die feit dat dit die risiko vir die oordrag van MIV verminder nie. “Ek het baie geleer. Ek weet nou besnydenis kan enige tyd van die dag en deur die loop van die jaar gedoen word.”Die deeltydse boer en VMMC-mobiliseerder het jong seuns en mans in sy gemeenskap aangemoedig om voordeel te trek uit gratis MIV-voorkomingsdienste. Norich maak afsprake en verwys inwoners na die betrokke dienste. Sedert sy opleiding is 13 van Norich se kliënte suksesvol medies besny, ses van Okakarara en sewe van Otjiwarongo. “Ek het besluit om by die VMMC-program aan te sluit, omdat inligting die sleutel is om die proses en voordele van besnydenis te verstaan. Dit is ook nie meer langer ’n tradisionele praktyk nie, maar ’n noodsaaklike nasionale MIV-voorkomingstrategie.”

Besnydenis kan MIV verhoed

Kommentaar

Republikein 2025-12-29

Meld asseblief aan om kommentaar te lewer

Besnydenis kan MIV verhoed

Kommentaar

Republikein 2025-12-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.