Bepalende oomblik vir wetenskap

Die Namibië Universiteit van Wetenskap en Tegnologie (Nust) het ’n belangrike wetenskaplike mylpaal bereik met die verkryging van Namibië se eerste hoëdeurset-platform vir die bepaling van die volgorde van genome.

Dit posisioneer die land om vir die eerste keer gevorderde genomiese navorsing plaaslik uit te voer.

Die Illumina NextSeq 2000 stel navorsers in staat om DNS in Namibië te ontleed, wat die afhanklikheid van internasionale laboratoriums verminder. Dit versterk ook die nasionale kapasiteit in gesondheidsorg, navorsing, landbou, biodiversiteitsbewaring en omgewingswetenskap.

Genoomvolgordebepaling behels die lees van ’n organisme se volledige genetiese kode, wat insigte vir die monitering van siektes, presisie-geneeskunde, landbou-innovasie en biodiversiteitsnavorsing bied.

Die platform het reeds ’n mylpaal bereik, met Nust wat die volgeordebepaling van die eerste Namibiese menslike hele genome volledig in die land suksesvol uitgevoer het. Dié deurbraak bied nuwe geleenthede vir presisie-geneeskunde, monitering van siektes, asook plaaslik relevante genomiese navorsing.

Prof. Lamech Mwapagha, medeprofessor in mediese biochemie aan Nust, het die ontwikkeling as ’n deurslaggewende oomblik vir wetenskap in Namibië beskryf. 

“Ons beskik nou oor die vermoë om gevorderde genomiese volgordebepaling plaaslik uit te voer. Dit stel ons navorsers in staat om data van hoë gehalte binne die land te genereer, terwyl ons afhanklikheid van internasionale geriewe verminder word," het Mwapagha gesê.

Benewens die ondersteuning van navorsing en nagraadse opleiding, is die verwagting dat die platform Namibië se vermoë sal versterk om op openbare gesondheidsuitdagings te reageer, landbou-innovasies te ondersteun en waardevolle Afrika-genomiese data tot wêreldwye navorsing by te dra. 

– [email protected]