Begroting briek gesondheidspersoneel

Nuusredaksie – Die werwing van nuwe personeel vir die ministerie van gesondheid en maatskaplike dienste is weens streng begrotingsbeperkings opgeskort tot die volgende boekjaar wat in April 2025 begin.In ’n verklaring wat deur sy uitvoerende direkteur, Penda Ithindi, uitgereik is, het die ministerie gereageer op ’n klagskrif van gekwalifiseerde, werklose geregistreerde verpleegkundiges wat kommer oor werksgeleenthede en aanstellingsprosedures geopper het.Ithindi verwys in die verklaring na die ministerie se uitbreiding van sy werksmag van gesondheidswerkers oor die afgelope twee begrotingsiklusse.Volgens die middeltermyn-begrotingsoorsig vir die 2025-’26-boekjaar is N$185 miljoen aan die ministerie toegeken om 814 bykomende gesondheidspersoneellede te werf. Dit sluit 449 verpleegkundiges, 134 mediese beamptes en tandartse, 103 verwante gesondheidswerkers en 107 administratiewe ondersteuningspersoneel in.Volgens Ithindi het die toevloei van gesondheidswerkers gehelp om druk by gesondheidsgeriewe landswyd te verlig. Dit het ook gehelp om dienslewering op ’n 24 uur-basis by verskeie klinieke oraloor die Khomasstreek moontlik te maak. Vir die huidige 2026-’27-boekjaar is N$241 miljoen van die toegekende begroting van N$259 miljoen reeds bestee. Teen die einde van September vanjaar is ongeveer 1 770 personeellede, insluitend 1 320 verpleegkundiges, by die openbare gesondheidsorgstelsel gevoeg, wat voorsiening vir beide nuwe poste en die vul van standaardvakatures maak. Eksterne ekonomiese toestande – ten spyte van die toevoegings – het die nasionale inkomste onder druk geplaas, wat die regering gedwing het om begrotingsdissipline uit te oefen, volgens hom. In die verklaring sê Ithindi dat, onder leiding van die ministerie van finansies, nuwe werwingsveldtogte gevolglik tydelik tot April volgende jaar opgeskort word.Hy het egter beklemtoon dat poste wat vakant raak weens aftrede of gewone personeelomset, steeds geadverteer en na gelang van behoefte gevul sal word.Ithindi het kommer uitgespreek oor sekere kwalifikasies en gemaan dat lisensiëringseksamens deur die Raad van Gesondheidsberoepe in Namibië (HPCNA) geadministreer word. Dié evaluasies is van kritieke belang om te verseker dat inkomende verpleegsters aan veiligheids- en sorgstandaarde voldoen voordat noodsaaklike gesondheidsorgdienste gelewer kan word.Hy het werklose verpleegkundiges versoek om te verseker dat hul rekords en kontakbesonderhede op datum by die Verplegingsraad van Namibië onder die vaandel van die HPCNA bly, met die oog op toekomstige werwingsfases. Ithindi het die beswaarde groep wat die klagskrif opgestel het, geprys vir hul toewyding en bereidwilligheid om oraloor die land, insluitend in landelike gebiede, diens te lewer. Hy het ook verwys na voortgesette planne om in behoorlike verblyf vir personeel in landelike gebiede te belê, soos fondse beskikbaar gestel word. – republikein@republikein.com.na

Begroting briek gesondheidspersoneel

Kommentaar

Republikein 2026-10-29

Meld asseblief aan om kommentaar te lewer

Begroting briek gesondheidspersoneel

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.