Bankmed in die knyp

Ogone Tlhage - ’n Vraagteken hang oor die mediese fonds Bankmed se toekoms na aanleiding van kommer dat sy toekomstige bedrywighede in gedrang kan wees.

Dié bevindinge word in ’n verslag uiteengesit oor kommer dat die fonds onderhewig is aan buitensporige eise terwyl bydraes tot die fonds onvoldoende is.

“Die fonds het die afgelope paar jaar buitengewoon hoë eise ervaar en ongelukkig het die solvensievlak van die fonds oor hierdie tydperk gedaal. Dit is hoofsaaklik te wyte aan lede en gesondheidsorgwerkers se gedrag in terme van oorbenutting van voordele bo en behalwe die begrotingsverwagting,” het Bankmed in die verslag gesê.

Bydraes tot die fonds was glo aansienlik laer as eise, ’n situasie wat – behalwe vir 2018 – vanaf 2017 tot 2022 geduur het.

“Eise was konsekwent hoër as bydraes en lede en gesondheidspraktisyns se gedrag het die solvensie en volhoubaarheid van die fonds bedreig,” het Bankmed gesê

Lede is wel die versekering gegee dat die fonds solvent sal bly.

“Daar is geen rede vir lede om bekommerd te wees nie, en daar is ook geen rede om te probeer eis vir onnodige medikasie of prosedures nie, aangesien alle eise nagekom sal word,” het die fonds gesê.

“Die raad van trustees sal eise noukeurig monitor om te verseker dat bedrog, vermorsing en misbruik nie plaasvind nie. Enige eise wat as moontlike oorbenutting, bedrog, vermorsing of misbruik geïdentifiseer word, sal nie goedgekeur word nie, en sulke eise sal volledig ondersoek word.”

Lede wat dit sal oorweeg om die fonds te misbruik, is afgeraai om so iets te probeer.

“Waar enige van die bogenoemde gevind word, sal die werkgewergroep ingelig word, en die fonds sal stappe doen wat hy gepas ag teen die lid of gesondheidswerkers,” het Bankmed gesê.

Bankmed is ’n beperkte fonds vir alle bankinstellings in Namibië en word deur Methealth Namibia Administrateurs geadministreer.

– [email protected]