Aanlyn video’s vul moontlik terapie aan

Die konsep van outonome sensoriese meridiaanrespons, of ASMR, kruip reeds jare lank in een van die vele verlate hoekies van die internet weg. Vir sommige is daar ’n seksuele konnotasie aan die verskynsel gekoppel. Diegene wat egter ASMR as ’n beroep beoefen (ASMRtists) ontken dié stelling. WAT IS ASMR?Die Amerikaanse Slaapstigting beskryf dit as die “diep ontspannende en aangename tinteling van die kopvel wat sommige mense ervaar in reaksie op sagte geluide, soos fluister, soms gekombineer met stadige, ritmiese bewegings”. Die tintelende sensasie staan onder entoesiaste van dié gier as “tingles” bekend. Jy kan dit aktiveer met oudio- en beeldmateriaal en van mense wat alledaagse take verrig, soos handdoeke opvou of hare borsel. Dit sluit ook geluide soos ritselende papier of lopende water in. Vir die eerste keer in ’n aanlyn forum het Jennifer Allen die term ASMR voorgestel. Sy het in 2016 tydens ’n onderhoud verduidelik dat sy die vier woorde vir ’n spesifieke rede gekies het. &bull; outonome – verwys na die spontane en onbeheerbare manier waarop die sensasie plaasvind.&bull; sensoriese – verwys na die feit dat die sensasie ’n sensoriese verskynsel is wat te doen het met die sintuie.&bull; meridiaan – verwys na die feit dat die sensasie ’n piek bereik.&bull; respons – verwys na die feit dat die senasie deur eksterne of interne faktore meegebring word.Die faktore wat ASMR kan meebring is hoofsaaklik ouditief, maar kan aangehelp word deur visuele faktore. Die algemeenste oorsake sluit in as iemand fluister of op verskeie voorwerpe tik. Navorsing wat in 2017 gedoen is, het daarop gedui dat stadiger, meer komplekse klanke en video’s wat meer detail-georiënteerd is meer ontspannend vir luisteraars en kykers was. SEKSUELE KONNOTASIE“Hulle het ’n studie daaroor gedoen, wanneer mense na ASMR luister, word hulle hartklop stadiger en hulle voel meer ontspanne. Wanneer jy seksueel gestimuleer word, is dit juis die teenoorgestelde,” het die Amerikaanse ASMRtist, Gina Klein, beter bekend as Gibi ASMR, in ’n onderhoud vir Spectrum met Jubilee gesê. “Ek vergelyk dit met ’n masseersessie. Wanneer jy die konteks verwyder, is dit basies dat ek alleen in ’n donker vertrek saam met ’n vreemdeling is en hierdie vreemdeling gaan my lyf masseer. . . Wanneer iets nuuts soos ASMR verskyn, is mense se eerste denke altyd in daardie lyn,” het sy verder verduidelik. “Ek dink die meer intieme styl van ASMR kan vir baie mense verwarrend wees,” het Raphael Mendez, beter bekend as RaffyTaphy ASMR, in dieselfde onderhoud gesê. GEESTESGESONDHEIDASMR-entoesiaste deel gereeld kommentaar oor hoe ASMR hulle gehelp het om verskeie geestesgesondheidsverwante probleme te takel, in so ’n mate dat ASMR selfs soms as alternatiewe terapie bestempel word. Sommige ASMRtists sê egter dit sal onverskillig wees om te beweer dat ASMR ’n moontlike plaasvervanger vir tradisionele terapie kan wees. “Ek het nog nooit gedink ASMR is ’n plaasvervanger vir terapie by ’n professionele persoon nie, maar ek sou absoluut sê dit is terapeuties,” sê ASMRtist FrivviFox, voorheen bekend as Frivolous Fox ASMR. Batala’s ASMR sê egter talle mense wat ASMR probeer, verstaan nie die konsep heeltemal nie.“Ek vind dat talle mense ASMR probeer om hul probleme op te los en as hierdie of daardie nie werk nie, raak hulle ontsteld. Ek kan nie jou terapeut wees nie, ek probeer net dat jy ontspan en kalmeer,” het sy gesê. Mendez glo talle kykers probeer ’n leemte met ASMR vul, aangesien hulle nie toegang tot tradisionele vorme van terapie het nie. “Een ding wat ook ingedagte gehou moet word, is dat terapie nie geredelik toeganklik vir talle mense is nie, veral nie vir jonger mense nie. Dit is iets wat ek nie in ag geneem het toe ek my YouTube-kanaal begin het nie,” sê hy.Klein verduidelik dat ASMR wel voordele vir geestesgesondheid inhou en sê sy het glo self voordeel uit ASMR getrek.“Ons onderskat hoe belangrik slaap is. Dit het my lewe vir jare geruïneer – ek nie kon slaap nie, want ek was so angstig. Toe ek die video’s begin maak het, het ek geweet dit het die potensiaal om ’n impak op mense se lewens te hê, maar ek het nie geweet dit kon so ver gaan nie,” sê sy. Sharon Dubois, bekend as ASMR Glow, glo meer navorsing oor ASMR is nodig, veral met betrekking tot die voordele wat dit vir mense met neurodiverse toestande, soos outisme en disleksie, kan inhou.“Ek is ’n voorstander van ASMR-verwante navorsing. Ek vind ek het talle mense in my aanlyn gemeenskap wat op die outistiese spektrum is en hulle smag na die gemak wat fisieke aanraking bied, maar kan nie die tekstuurervaring daarvan verdra nie. Dus gee ASMR hulle daardie gemak sonder die ongemak,” het sy gesê. Sy sê egter as die kommentare van mense wat gereeld na ASMR luister in ag geneem word, gee dit reeds ’n aanduiding dat ASMR moontlik tradisionele vorme van terapie kan aanvul.“Daar is so baie mense met depressie en selfdoodgedagtes wat vertel hoe ASMR hulle gehelp het, so ek dink ASMR kan hand aan hand werk met verskeie bestaande vorme van terapie,” het Dubois gesê. GESKIEDENISDie Virginia Woolf-boek, Mrs. Dalloway, wat in 1925 gepubliseer is, maak volgens menige ASMR-entoesiaste verwysing na ’n sensasie wat soortgelyk aan ASMR is. Die skrywer en vertaler van Oostenryk, Clemens Setz, steun op ’n paragraaf waar ’n verpleegster met ’n pasiënt praat. In dié gesprek word die verpleegster se stem as diep, sag en rustig beskryf, maar met ’n grofheid soos ’n sprinkaan in haar stem. Hierdie het glo die fiktiewe pasiënt se “ruggraat gestreel en golwe van klank na sy brein gestuur”. David Huron, ’n professor aan die Ohio State University se skool vir musiek, meen ASMR hou verband met die persepsie dat daar geen bedreigings naby is nie en onbaatsugtige aandag wat die kyker/luisteraar “ontvang”.Volgens hom het hierdie sensasie ’n sterk ooreenkoms met die sensasies van versorging deur ’n ander, nie noodwendig om skoon of vertoonbaar te word nie, maar eerder om ’n band daarmee te vorm.Breinskanderings van mense wat ASMR ervaar, ondersteun Huron se teorie met dele van die brein wat geassosieer word met sosiale bande en die sensasies wat verband hou met fisieke aanraking.- irene@nmh-hub.com.na

Aanlyn video’s vul moontlik terapie aan

Kommentaar

Republikein 2025-10-30

Meld asseblief aan om kommentaar te lewer

Aanlyn video’s vul moontlik terapie aan

Kommentaar

Republikein 2025-10-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.