Warm sop én harte vir kinders

Die Maltas-klub Namibië het onlangs ’n dag van vreugde na die kinders van die Aminuis-kinderhuis in die Omahekestreek gebring toe hulle klere, warm sop en eetgerei aan die kinderhuis geskenk het.

Dit is moontlik gemaak deur die klub wat sedert 2011 gemeenskapsprojekte oraloor Namibië aangepak het.

Vir die kinders en die plaaslike gemeenskap was die skenking ’n baie spesiale geleentheid wat glimlagte op almal se gesigte gebring het. Ongeag die talle daaglikse uitdagings wat die gemeenskap in die gesig staar, het die besoek ’n gevoel van hoop en dankbaarheid gebring.

Vir die kinders het die uitreik oor veel meer as net kos en klere gegaan. Dit was ’n duidelike boodskap dat hulle waardevol is en dat daar mense is wat werklik vir hul welstand en toekoms omgee. 

Die opgewondenheid onder die kinders was duidelik sigbaar toe hulle die skenkings ontvang het.

Die Maltas-klub Namibië staan reeds sedert 2011 vir sy leierskapprojekte en gemeenskapsinitiatiewe bekend wat daarop gemik is om jongmense en kwesbare gemeenskappe oraloor die land deur werkwinkels en uitreikprogramme te ondersteun. 

Die organisasie se boustene is die oortuiging dat selfs klein dade van omgee ’n groot verskil in mense se lewens kan maak.

Die inwoners van Aminuis het hul opregte waardering teenoor die Maltas-klub, die betrokke skenkers en al die vrywilligers wat hierdie projek moontlik gemaak het.

Die klub hoop dat hierdie gebaar ander Namibiërs sal inspireer om ook ’n helpende hand uit te reik waar die nood die grootste is. 

Die volgende groot projek vir die organisasie is die bou van ’n sopkombuis op Tsumkwe, wat vir Januarie 2027 beplan word.

– [email protected]