Wanneer verlies in hoop verander

Rou is ’n universele menslike ervaring, en tog bly dit een van die mees isolerende reise wat ’n mens kan aanpak. Wanneer ’n geliefde sterf, kring die impak daarvan deur hele huishoudings uit en raak dit elkeen op verskillende maniere.

Sybrand de Beer het saam met sy vrou, Ronel, in 2017 Legacy of Love gestig ná die verlies van hul 11-jarige dogter, Lumé, aan akute respiratoriese noodsindroom (ARDS). Wat as ’n diep persoonlike reis begin het, het ontwikkel tot ’n wyer verbintenis om Namibiese gesinne en kinders te ondersteun wat deur rou, verlies en trauma geraak word. 

Die naam Legacy of Love weerspieël dit waarin die De Beer-gesin glo: Wanneer ’n geliefde sterf, eindig die verhouding nie – die liefde, herinneringe en impak wat daardie persoon op ons lewens gehad het, word ’n blywende nalatenskap wat ons voortdra.

“Ek het Sybrand en Ronel tydens hul donkerste uur ontmoet. Die afgelope twee en ’n half jaar het ek gesien hoe hulle deur hul geloof in Christus hierdie duisternis in glorieryke lig verander. 

“Nie net vir hulself nie, maar vir baie ander wat in ’n soortgelyke duisternis gewerp is. Hul projekte sal ’n impak op baie lewens hê,” sê lewensafrigter en opvoeder, Nantie van Aswegen.

Vandag bied Legacy of Love praktiese hulpbronne, veilige ruimtes en gemeenskapsondersteuning aan gesinne en kinders wat verlies en trauma ervaar.

GEMEENSKAP IN AKSIE

Legacy of Love bied jaarliks ’n gholfdag aan wat as ’n sleutelgeleentheid vir beide die insameling van fondse en bewusmaking dien. 

Deur plaaslike besighede, gholfspelers, borge en gemeenskapslede byeen te bring, fokus die geleentheid op ’n werklikheid wat elke gesin op een of ander stadium raak.

Volgens Ronel stel die geld wat ingesamel word die span van Legacy of Love in staat om voort te gaan met projekte soos hul spesiale wegbreeknaweke wat fokus op diegene wat deur trauma en rou geraak word, “buddy benches” by skole, troosbokse en roujoernale en om hierdie tipe ondersteuning toeganklik vir gesinne te maak wat dit nodig het.

“Die gholfdag help ons om bewusmaking rondom rou te skep. Dit bring besighede, borge, gholfspelers, vriende en lede van die breër gemeenskap byeen vir ’n kwessie wat feitlik elke gesin op een of ander stadium raak,” sê Sybrand. 

“Ons is uiters dankbaar vir die ondersteuning wat ons ontvang. Mense dra op baie verskillende maniere by – deur spanne in te skryf, putjies en pryse te borg, items vir die veiling te skenk, op die veiling te bie, of ons bloot te help om die dag te organiseer.

“Daardie gesamentlike ondersteuning is wat die werk van Legacy of Love moontlik maak,” verduidelik hy.

Buiten vir die fondse wat ingesamel word, brei die geleentheid bewusmaking in die gemeenskap uit en bevorder dit ’n breër netwerk van empatie en ondersteuning vir bedroefde gesinne, sê Sybrand.

Hoewel die gholfdag as ’n belangrike platform dien, stuur Legacy of Love ook jaarliks verskeie ander betekenisvolle inisiatiewe oraloor Namibië van stapel.

Een van die inisiatiewe is spesiale wegbreeknaweke vir gesinne wat rou; dit bied ’n geleentheid – binne ’n veilige en ondersteunende omgewing – om aan terapeutiese aktiwiteite deel te neem en ervarings te deel met ander wat werklik verstaan.

’n BANKIE VIR ’N ‘BUDDY’

Daarbenewens bied Legacy of Love ook die “buddy benches” aan wat sedert 2018 by skole oraloor Namibië geïnstalleer is. 

Dié bankies gee kinders ’n veilige, sigbare ruimte om vir ’n wyle hier te kom skuil wanneer hulle eensaam of oorweldig voel. Dié projek bevorder vriendelikheid, bekamp emosionele en fisieke afknouery en bevorder inklusiewe skoolkulture.

“’n Belangrike deel van die inisiatief is om bewusmaking oor afknouery te skep en te help om ’n skoolkultuur van vriendelikheid, insluiting en omgee vir mekaar te bevorder. 

“Ons moedig kinders aan om te verstaan ​​dat afknouery nie net fisiek is nie, dit kan ook emosioneel wees,” sê Sybrand. 

TROOSBOKSE

Legacy of Love se troosbokse en roujoernale is praktiese hulpmiddels en sorgpakkette wat spesiaal so ontwerp is om troos en leiding tydens die rouproses te bied.

Sybrand en Ronel is ook die gasvrou en gasheer van die jaarlikse kersligseremonie, ’n toegewyde gemeenskapsbyeenkoms waar families hul geliefdes wat oorlede is, vereer en onthou.

En dan is daar Legacy of Love se fisiese uitdagings wat durf en uithouvermoë op die proef stel, terwyl dit ook klem op bewusmaking plaas. Geleenthede soos die moordende Desert Dash en Munga Grit Le Dur word gebruik om beide fondse in te samel en openbare bewusmaking te skep deur deelnemers se persoonlike uithouvermoë uit te daag. 

“Ek word geïnspireer deur die werk wat Legacy of Love doen. Die mensdom ken geen groter tragedie as die hartseer wat ons omhul wanneer jy iemand verloor wat jy liefhet nie. 

“Die keuse wat ons het, is om óf op te staan ​​óf te val. Legacy of Love verpersoonlik die krag van die mensdom,” sê Gernot de Klerk, kommunikasiebestuurder van Nedbank.

Legacy of Love beoog nie om rou uit te wis nie, maar eerder om die gesprek daaroor te verander, verduidelik Sybrand. 

Deur emosies te erken en praktiese hulpmiddels te verskaf, help die organisasie individue om te besef hul gevoelens is normaal en genesing beteken nie dat hulle vergeet nie.

“Ons kan nie iemand se hartseer wegneem nie, en dit is nie ons doelwit nie. Wat ons kan doen, is om mense te help verstaan ​​dat wat hulle voel, geldig is,” sê Sybrand.

Vir Ronel en Sybrand het die transformasie van hul eie hartseer in ’n bron van ondersteuning vir ander ’n dieper en groter doel gebied. 

Deur veilige ruimtes te skep waar mense vrylik hul geliefdes se name kan noem en hul stories kan deel, verseker Legacy of Love dat selfs in die donkerste dae niemand alleen hoef te treur nie.

“Ons kan nie verander wat met ons gebeur het nie, maar ons kan kies wat ons daarmee doen. 

“As ons ervaring ’n ander gesin kan help om minder alleen te voel in hul donkerste dae, dan bly iets betekenisvol uit daardie verlies groei,” sê Sybrand. 

–  [email protected]