Waar hoop wortel skiet

Hier bly van die armste inwoners, met die meeste sonder toegang tot ‘n ordentlike skuiling teen wind en weer, lopende water, toilette of krag. Vir die kinders en jong mense van die Goreangab-informele nedersetting in Windhoek is daar weinig indien enige sport- of ontspanningsgeriewe buiten die knopperige kronkelpaadjies wat tussen skuilings en sinkhuisies bult-op en bult-af kronkel. Maar hier het iets begin groei, het hoop wortel geskiet wat aan kinders die geleentheid bied om weer te kan droom, maar bowenal om te kan glo die droom kán waar word.In 2020 met Namibië se eerste grendeltydperk tydens die Covid-19-pandemie word Goreangab en sy inwoners hard getref deur die feit dat skole hul deure sluit en alle sport verbid word. Skielik was daar niks om te doen en nêrens heen om te gaan nie. Maar dit is juis toe dinge die donkerste lyk, wat ‘n sprankie hoop opvlam. ‘n Groep seuns wat langs die rivier in die nedersetting sokker speel, vra die broers Nixon Marcus en David Nakutwima om vir hulle ‘n sokkerspan saam te stel. Die broers en die seuns se gedeelde liefde vir die spel sorg vir ‘n onmiddellike band en gou is daar naweke ‘n informele samekoms waar sokker en samesyn hoogty vier. Dit sou groei tot die Riverheights Football Academy wat aan kinders ‘n velige ruimte, mentorskap en die kans om groot te droom bied. Hier gaan dit oor soveel meer as net sokker. Hier kan kinders uit alle vlakke van die samelewing saam droom om eendag ‘n doel vir hul land aan te teken. Die akademie se stigters is dit eens dat elke kind, ongeag sy of haar agtergrond, toegang tot onderrig, asook sport- en kultuurgeleenthede verdien. Hier is sokker ‘n manier om potensiaal te ontsluit, talent te ontgin en te koester en drome van ‘n vergete gemeenskap en sy kinders te probeer bewaarheid. Met hul leuses van “Die lewe is ‘n spanpoging” en “Moet nooit ophou glo nie” het die akademie se spanne reeds die afgelope paar jaar gewys dat hulle ten spyte van hul agtergrond en persoonlike uitdagings verenig is in dryfkrag en deursettingsvermoë deur agtereenvolgende jeugligatitels in te palm. Riverheights se hoop is om met sokker en onderrig hoop en ‘n verandering in die lewens van meer as 150 kinders en jong mense tussen die ouderdomme van 7 en 19 te bring. Tot 2022 was die fokus van die akademie om sokkerspanne met voldoende afrigting op die been te bring om die spanne in staat te stel om aan die plaaslike sokkerliga te kan deelneem. Weens die lang duur van die grendeltye tydens die Covid-19-pandemie en skole wat gevolglik gesluit was, het Goreangab se kinders nie die voorreg van aanlyn onderrig gehad nie. Die gevolg was dat baie in 2022 of nie geslaag het nie of baie slegte uitslae behaal het. Die wat gedruip het, is nie weer by hul skole aanvaar nie en ouers moes noodgedwonge hul kinders na ander skole oraloor die land stuur. Dit het ‘n geweldige impak op die spanne gehad, met noue vriendskapsbande wat tydens die jare saam op die sportveld gesmeek is, wat onderbreek is of verlore gegaan het. Dieselfde gevolge was op die positiewe ontwikkeling wat deur die kinders gemaak is deur jare van afrigting. In 2023 neem Riverheights die besluit om ‘n naskoolse onderrigprogram te begin wat sy spelers ook op akademiese vlak ondersteun. Weens beperkte hulpbronne is aanvanklik net op graad 8 tot 11 gefokus en op 30 spelers wat sedert die begin deel van die akademie was. In Februarie 2023 is begin met drie weeklikse onderrigsessies in wiskunde, Engels en geografie wat deur toegewyde vrywilligers aangebied is. Riverheights het ‘n vennootskap met die Jakob Marengo Sekondêre Skool aangegaan wat klaskamers, die ondersteuning van onderwysers teen ‘n minimale fooi verskaf het en ook gehelp het om die program te bestuur. Sedertdien het nog spelers deelgeword van die onderrigprogram, terwyl dit uitgebrei het om ook Engelse lesse vir spelers in primêre skool aan te bied. Riverheights se langtermyn- doelwit is om ‘n park bestaande uit vraghouers naby die sokkervelde op te rig wat die skoolondersteuningsprogram, ‘n biblioteek, ‘n mediakamer en ook ‘n kombuis te huisves. Les vir les, bal vir bal en wedstryd vir wedstryd word Riverheights se stigter Nixon Marcus, ‘n suksesvolle regspraktisyn met sy eie regsfirma, se droom waar om die akademie se spelers met die vaardighede en selfvertroue toe te rus om impakvolle bydraers tot die land se maatskaplike en ekonomiese landskap te word. Kliek hier: https://q.my.na/CLGW

Waar hoop wortel skiet

Kommentaar

Republikein 2025-11-03

Meld asseblief aan om kommentaar te lewer

Waar hoop wortel skiet

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.