Volksmoord op Lüderitz herdenk

Die Nama Tradisionele Leiersvereniging (NTLA) bied sy eerste jeugberaad asook die jaarlikse herdenking van die volksmoord op Lüderitz aan. Die jeugberaad skop vandag by die Waterfront-ouditorium af en duur tot eerskomende Vrydag. Die jaarlikse herdenking van die volksmoord vind Saterdag op Shark Island plaas.Dié dag – 12 April – is ’n belangrike datum in die geskiedenis van die Namibiese volksmoord. Duitse koloniale troepe onder leiding van Kurt von Francois het op 12 April 1893 die nedersetting van Hornkrantz aangeval waar kaptein Hendrik !Nanseb Witbooi met saam met die /Khowese-stam en ander Nama-stamme hulself gevestig het. “Dit is hier waar Kurt von Francois die eerste uitwissingsbevel teen die Nama-mense uitgereik het. “Die NTLA Gaogu wat tien wettig-erkende Nama Tradisionele Owerhede in Namibië verteenwoordig, beskou dit dus as die eerste optrede van volksmoord om met duidelike bedoeling ’n groep mense op Namibiese grond uit te wis,” verduidelik Johannes Ortmann, die NTLA se projekkoördineerder.Josef Isaacks, die voorsitter van die ||Kharas-streekraad, sal die jeugberaad amptelik saam met Brian Kagoro open. Laasgenoemde is die besturende direkteur van programme by die Open Society Foundation wat die openingsrede virtueel op die eerste dag van die beraad sal lewer. Verskeie onderwerpe sal tydens tegniese sessies gedurende die beraad bespreek word.“Dit sluit die Nama-geskiedenis, die volksmoord asook vergoeding in. “’n Regsadviseur van NTLA, Lucius Murorua, sal die jongste nuus oor die huidige volksmoordhofsaak verskaf en ook praat oor internasionale regsargumente sowel as die gesamentlike verklaring en wat dit beteken. “Namport se beoogde uitbreiding van die hawe sal ook bespreek word,” sê Ortmann. Die fokus sal ook op vaardighede en werksgeleenthede binne die groenwaterstof- en olie- en gassektore val. Ander onderwerpe onder bespreking en wat jeugverwant is, sluit in onderwys en gesondheid, asook dwelm- en alkoholmisbruik.“Hyphen en TotalEnergies sal die jongste nuus oor hul projekte asook bestaande geleenthede bespreek. “Ons het ook kundiges van die ministeries van grondhervorming, onderwys, gesondheid, myne en energie, landbou, die groenwaterstofraad asook die jeugraad uitgenooi,” sê Ortmann. Vyf werksgroepe sal op die tweede dag van die beraad gevorm word.“Hierdie groepe sal fokus op toegang tot grond en natuurlike hulpbronne soos minerale en alle natuurlike hulpbronne wat ontgin kan word; toegang tot onderwys met betrekking tot die ontwikkeling van vaardighede en werksgeleenthede; toegang tot politieke besluitneming; en toegang tot maatskaplike dienste en wel gesondheid. “Behuising, maatskaplike toelaes en basiese sanitasie asook toegang tot die nuwe ekonomiese ontwikkelings in die groenwaterstof-, olie- en gasbedryf sal ook onder die loep kom.” – republikein@republikein.com.na

Volksmoord op Lüderitz herdenk

Kommentaar

Republikein 2025-04-30

Meld asseblief aan om kommentaar te lewer

Volksmoord op Lüderitz herdenk

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie