‘Tuindorp’ in kloue van verval

Gefrustreerde inwoners van Okahandja sê sedert die inswering van die dorp se burgemeester, Ileni Mutumbulwa, op 12 Desember verlede jaar, was daar geen sigbare vordering om die dringende kwessies wat die gemeenskap steeds teister, te takel nie.Republikein het tydens die afgelope naweek verskeie informele nedersettings in en om die dorp besoek. Inwoners het hul diep teleurstelling uitgespreek in wat hulle as ’n gebrek aan leierskap en kommunikasie van die burgemeester se kantoor beskryf het.’n Inwoner wat verkies het om anoniem te bly, het verwarring oor die plaaslike leierskap van die voormalige Tuindorp uitgespreek.“My dogter, ek weet nie eens wie die nuwe burgemeester is nie!”Nog ’n inwoner wat in sigbare nood verkeer, het gesê terwyl ander dorpe se burgemeesters bedrywig is, “is die een van Okahandja soos ’n spook”.“Ons wil nie vergelyk nie, maar hoe lank moet ons nog as gevolg van ons leier ly?” het die inwoner gevra.Verskeie inwoners het verwys na ’n gebrek aan gemeenskapsvergaderings met die burgemeester, veral in informele nedersettings waar lewensomstandighede steeds haglik is.Volgens die beswaarde inwoners is hulle nie ’n platform gegee om direk met die burgemeester te skakel of hul griewe te lug nie.Die maatskaplike kommentator Jakob Naomab het op sosiale media verwys na ’n “diep gevoel van dringendheid en toenemende frustrasie” onder inwoners.Naomab het die dorp se leierskap aan die beloftes herinner wat in aanloop tot die verkiesings gemaak is.“Ons het julle met leierskap toevertrou, in die geloof in julle beloftes van verandering, ontwikkeling en verbeterde lewensomstandighede. Tog is daardie hoop vandag besig om te vervaag,” het Naomab gesê.Hy het verwys na voortgesette mislukkings in dienslewering soos die verslegtende toestande van paaie wat gekenmerk word deur slaggate, rioolstelsels wat verstop is en oorloop, stank in woongebiede en stukkende straatligte wat gemeenskappe snags kwesbaar laat.“Dis nie nuwe probleme nie, maar dis probleme wat julle onderneem het om te takel,” het Naomab.“Leierskap is nie ’n titel nie, dis ’n verantwoordelikheid. Stilte en ’n gebrek aan optrede in die aangesig van hierdie uitdagings, is onaanvaarbaar,” het hy gesê.Volgens inwoners het kwessies soos die ophoping van vullis, die verval van infrastruktuur en rioolstortings die afgelope jare vererger. Beloftes soos die afskryf van pensioenarisse se waterskuld, soos op ander dorpe, het ook nie gerealiseer nie.Daar blyk ook ’n gebrek aan werklike planne te wees om die dorp se uitdagings aan te pak. Inwoners beskuldig ook die dorp se leiers daarvan dat hulle beloftes tydens verkiesingsveldtogte bloot vir hul eie belang gemaak het.“Op die oomblik voel dit soos ’n oorlewingspel vir diegene in magsposisies en nie diens aan die mense nie,” het een inwoner gesê. “Wat ons sien, is nie wat ons belowe is nie.”Geen reaksie is ontvang op versoeke aan die munisipaliteit se kantoor vir openbare betrekkinge vir inligting oor die burgemeester se beplande geleenthede of gemeenskapsuitreik-inisiatiewe nie. – aurelia@nmh-hub.com.na

‘Tuindorp’ in kloue van verval

Kommentaar

Republikein 2026-09-17

Meld asseblief aan om kommentaar te lewer

‘Tuindorp’ in kloue van verval

Kommentaar

Republikein 2026-09-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.