Swakopmund begroot N$690 miljoen vir 2024/25

Die oorgrootte meerderheid van die Swakopmundse munisipaliteit se jaarbegroting word aan bedryfskoste bestee. Tydens &#039;n raadsvergadering het dit aan die lig gekom dat ongeveer N$578 miljoen, 84% van die munisipaliteit se begroting vir die 2024/2025 finansiële jaar, uitgesit is vir bedryfsuitgawes. Kapitale uitgawes is N$112 miljoen. Die voorsitter van die munisipaliteit se bestuurskomitee, Blasius Goraseb, het daarop klem gelê dat die munisipale begroting voorkeur gee aan uitgawes wat noodsaaklik is om ontwikkeling in Swakopmund te bevorder. Onder meer sal dorpsbeplanning, die voorsiening van gedienste grond, behuising, infrastruktuur vir paaie en riool, konstruksie, die ontwikkeling van strande, en werkskepping voorkeur geniet. "Dit is nie bloot uitgawes nie, dit is beleggings in die toekoms van Swakopmund wat gemik is op volhoubare groei, verhoogde lewenskwaliteit en om gereed te wees vir die uitdaging van ’n dorp wat versnelde groei in die gesig staar," het Goraseb by die vergadering gesê. ’n Omvattende struktuurplan is ook ontwerp om sosio-ekonomiese geleenthede vir Swakopmund se groei en ontwikkeling te identifiseer. Die volhoubaarheid van lewenstandaarde en omgewingsbewaring is ook ’n prioriteit en het ten doel om toegangklikheid, gemeenskapsgeriewe en ekonomiese geleenthede kenmerke van die kusdorp te maak. Die bevordering van toerisme, onderwys, gesondheidsorg en skoon tegnologie is ook op die raad se agenda, terwyl daar steeds ’n verbintenis is tot die bevordering van Swakopmund se slimstadmodel wat omgewingsvolhoubaarheid en visionêre ontwikkeling prioritiseer. Die meerderheid van die begroting is toegeken aan infrastruktuur van paaie met N$29 miljoen wat aangewys is vir die beplanning en ontwerp van verskeie paaie en die ontwikkeling van nuwe areas soos DRC se uitbreiding een. Die raad het ook aangedui dat die stormwaterstelsels opgegradeer sal word.’n Totaal van N$37 miljoen is geoormerk vir water- en rioolbestuur met onderskeidelik N$18 miljoen en N$19 miljoen wat hiervoor begroot is. "Ingesluit in die infrastruktuur vir grootmaatwater, is planne om ’n waterreservoir op te rig. Ons besef die belangrikheid van vooruitsig en beplanning, daarom dat ons begroot het vir die ondersoek en ontwerp van ’n waterreservoir vir Vineta-Noord, Myl 4, Ocean View, asook noordelike ontwikkeling. Die reservoir sal nie net voorsien in die behoeftes van ons gemeenskap wat uitbrei nie, maar sal ook gemoedsrus bied in die gesig van toekomstige uitdagings ten opsigte van infrastruktuur," sê Goraseb.Die installering en opgradering van die huidige rioolstelsels sal huidige tekortkominge aanspreek en die risiko van onder meer die oorloop van riool verminder. Deur hierdie projekte te finansier, beplan die raad nie net vir onmiddellike infrastruktuurbehoeftes nie, maar beplan ook strategies vir die gemeenskap se toekomstige groei.Die bou van ’n noodskuiling is ook ingesluit in die raad se 2024/2025 begroting. Die noodskuiling sal ’n toevlug bied tydens krisisse, en die veiligheid en welstand van gemeenskapslede in nood verseker. Die geriewe sal toegerus wees om noodsaaklike dienste soos tydelike behuising en die nodige sorg te bied, en verseker dat kwesbare mense die hulp kry wat hulle nodig het in tye van nood. Ten slotte het die raad in die lig van heersende ekonomiese omstandighede &#039;n tariefverhoging van 5% oorweeg vir diensverwante tariewe vir die 2024/2025 fiskale jaar, behalwe vir die tariewe wat verband hou met senior burgers wat in Swakopmund woon. - republikein@republikein.com.na

Swakopmund begroot N$690 miljoen vir 2024/25

Kommentaar

Republikein 2026-05-05

Meld asseblief aan om kommentaar te lewer

Swakopmund begroot N$690 miljoen vir 2024/25

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.