Rehoboth mik vir Dorp van die Jaar-kroon

Rehoboth pronk onder vanjaar se genomineerdes in Kwêla se Dorp van die Jaar-kompetisie en lede van die publiek kan tot Vrydag om 12:00 vir Rehoboth stem deur die woord “Rehoboth” per SMS na 33157 te stuur.

Elke SMS kos N$1,50 en nie meer as 30 stemme sal per selfoonnommer aanvaar word nie.

In Rehoboth se segment van die program Kwêla wat op kykNET (DStv kanaal 144) uitgesaai is, is verskeie van dié dorp se gewildste besienswaardighede ten toon gestel, soos die Edenberry-aarbeiplaas met sy bekende onderstebo huis en die “I Love Rehoboth"-teken oorkant die dorpsraad se kantoor.

Die komitee vir gemeenskapsontwikkeling op Rehoboth het ook ’n boomplantgeleentheid saam met lede van die dorpsraad en die junior dorpsraad gehou.

“Ons is geëerd om Kwêla hier te hê om te ervaar wat Rehoboth spesiaal maak. Hierdie geleentheid stel ons in staat om ons dorp se warm gasvryheid, ryk kultuur en die pogings van ons toegewyde burgers wat onvermoeid werk om die gemeenskap op te hef, ten toon te stel,” het die voormalige burgemeester, Amanda Groenewaldt, gesê.

– [email protected]