Ouma Lena is 102

As die hart van ’n nasie in een vrou se lyf kon klop, sou dit ouma Lena Bezuidenhoudt s’n wees, wat vandag 102 jaar oud word. Gebore op 11 Junie 1923 is ouma Lena ’n lewende argief en biblioteek van meer as ’n eeu se stryd, lag, geskiedenis en hoop. Haar storie begin op Mariental waar sy gebore is en later na ’n nederige plaas met die naam Okahandja trek, wat ouma Lena altyd geglo het gaan eendag ’n bedrywige dorp word.“Die eerste ding wat ek van Okahandja onthou, is stof en drome,” vertel ouma Lena. Sy was die medestigter van die Primêre Skool Eden in 1966 en was saam met die Primêre Skool Aurora een van die twee skole wat toe op Okahandja was. In 1974 sluit ouma Lena amptelik by Swapo aan, hoewel haar werk in die gemeenskap reeds jare tevore begin het. Gemeenskaplede is vandag dit steeds eens dat dit sy was wat Swapo op die voormalige tuindorp begin het. Sedert 1988 het sy haar eerste huis aan Swapo beskikbaar gestel vir die gebruik en huur as ’n kantoor, ’n reëling wat jare later steeds geld. Dit was haar eerste huis, sê ouma Lena en ook die een waaruit sy graag begrawe wil word. In 1980 was sy instrumenteel in die begin van die huidige Verenigde Gereformeerde Kerk (VGK) en in 1988 en 2005 help sy ook om ouetehuise op die been te bring. Met die hulp van haar seuns help ouma Lena om 30 huise vir Plan-vegters, 60 huise in Grysblok, asook die koshuis vir die Primêre Skool Nau-Aib te bou.Sy is die trotse matriarg van ’n groot stamboom wat 13 kinders insluit, van wie vyf dogters en sewe seuns nog leef, 43 kleinkinders, 81 agterkleinkinders en 21 agteragterkleinkinders. Valerie Bezuidenhoudt, haar skoondogter, vertel ouma Lena is Nama, Afrikaans en Engels magtig en dit hang van haar bui af watter een van die drie tale sy op ’n gegewe dag praat.“Wanneer sy die dag kwaad opstaan, praat sy heeldag Nama!” Ouma Lena is een van ses susters waarvan net twee nog leef. Een van haar herinneringe is die moeilike tye toe sy 14 bokkoppe en -pote vir net 50 sent moes skoonmaak. Ten spyte van haar dekades van opoffering, het ouma Lena nog nooit veteraanvoordele ontvang nie, iets wat volgens haar kinders ’n diep wond is wat nog nooit genees het nie.“Ons vra net dat ons ma erken word vir die reus wat sy is,” het een van haar seuns gesê. “Sy het haar huis, haar krag en haar lewe aan die bevrydingstryd gegee en die land het vergeet,” het hy gesê.Ouma Lena onthou nog name soos Ben Ulenga, Niko Bessinger, John Ya-Otto en Daniel Tjongarero en vertel “dit is die mense saam met wie ons braaivleis geëet het toe ons die huis vir Swapo as ’n kantoor gegee het”.Sy het geen bitterheid in haar hart nie, net die herinneringe van presidente soos wyle Hage Geingob en Sam Nujoma.“Ek weet ek is ouer as hulle, maar hulle was my presidente.” – republikein@republikein.com.na

Ouma Lena is 102

Kommentaar

Republikein 2025-12-19

Meld asseblief aan om kommentaar te lewer

Ouma Lena is 102

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.