Ontsluit ||Kharas se potensiaal

Beslissende optrede is nodig om die potensiaal van die Neckartaldam – wat “lankal agterstallig is” – te ontsluit.

Volgens die goewerneur van die ||Kharasstreek, Dawid Gertze, is die wagtyd vir die dam om sy potensiaal te verwesenlik “te lank en is dit onaanvaarbaar en ondraaglik”.

“Ons jeug wag vir werk. Ons opkomende boere wag vir grond. Ons besighede wag vir geleenthede.

“Dit kan nie onverpoosd voortduur nie. Ek doen ’n beroep op die verantwoordelike lynministerie om die bal spoedig en dringend aan die rol te kry,” het Gertze in sy hoofrede by die opening van die 2025 Keetmanshoop Landbou-, Nywerheids- en Toerisme-ekspo (KAITE) gesê.

Gertze beklemtoon die bestaande potensiaal langs die lewegewende takke van die Oranjerivier, Naute- en Neckartaldam is gereed vir uitbreiding.

“Dit is nie bloot ’n strewe van die streek nie, maar ’n belangrike hoeksteen om voedselsekerheid te takel; nie net binne ons wonderlike ||Kharasstreek nie, maar ook om die voordele daarvan ver buite ons grense uit te brei,” het hy gesê.

“Die streek bied buitengewone potensiaal vir ekonomiese groei, veral binne die landbou- en toerismesektor. Wanneer die innoverende gees van KAITE uiteindelik die water van die Neckartaldam ontmoet, sal ||Kharas ’n spilpunt van vernuwing, ’n leier in volhoubare landbou en ’n vooraanstaande toeristebestemming word,” het Gertze gesê.

Hy het beklemtoon dat die regering hervormings versnel om makliker sake te doen.

“Ons het die platform geskep. Nou het ons jou nodig om jou kapitaal, jou tegnologie en jou globale markverbindings te bring.

“Belê in landbouverwerking, in koueberging, in waardetoevoeging. Laat ons hierdie nywerhede saam bou en ||Kharas die landbousakesentrum van Namibië maak,” het Gertze beklemtoon.



BOU DIE STREEK

Hy het beklemtoon die uitbreiding en ontwikkeling van die landbou- en toerismesektor is nie bloot ekonomiese begeertes nie.

“Dit is die einste fondament waarop ons ’n toekoms van verbeterde werksvooruitsigte sal bou en die groei van ons dinamiese klein- en mediumgrootte ondernemings sal bevorder.

“KAITE speel reeds ’n sleutelrol in die bevordering van ons toerismesektor, wat nie net die unieke natuurskoon uitlig nie, maar ook die ryk kulturele erfenis en uiteenlopende besienswaardighede van die ||Kharasstreek,” het hy gesê.

Gertze het bygevoeg dat die grootliks onderontginde potensiaal van die ||Kharasstreek in die ontwikkeling van die landbousektor in harmonie met die toerismesektor lê.

“Verder staan ons op die punt van ’n transformerende era met die beoogde olie-, gas- en groenwaterstofenergie-ontwikkelings, wat belowe om ongekende ekonomiese geleenthede te ontsluit.”

Die goewerneur het ook beklemtoon dat die groei van klein- en mediumgrootte ondernemings (SME’s) veral belangrik is, aangesien dit dikwels die primêre werkgewers in landelike gebiede is en beduidend tot plaaslike ekonomieë bydra.

“Deur hierdie sektore te versterk, skep ons nie net werk nie, maar bemagtig ons ook ons gemeenskappe en verseker ons ’n blinker toekoms vir toekomstige geslagte,” het Gertze gesê.



GESAMENTLIKE POGING

Hy het vir groter deelname en ondersteuning van belanghebbendes vir KAITE gevra.

“Die belangrikheid van hierdie geleentheid kan nie oorskat word nie. Dit is meer as net ’n uitstalling; dit is ’n dinamiese platform waar idees saamvloei, vennootskappe gesmee word en geleenthede ontgin word.

“Dit is die grond waar ons landelike en stedelike gemeenskappe ontmoet en waar die gewoel van Keetmanshoop met die stil wysheid van ons dorpe saamsmelt,” het Gertze gesê.

“Vir Keetmanshoop in die besonder verteenwoordig KAITE ’n beduidende ekonomiese inspuiting, wat plaaslike handel stimuleer, klein- en mediumgrootte ondernemings ondersteun en ’n gevoel van gemeenskapstrots bevorder.

“Vir die ||Kharasstreek in die algemeen is hierdie ekspo ’n katalisator vir streekontwikkeling. Dit ondersteun belangrike vennootskappe tussen die regering, die private sektor en die burgerlike samelewing, wat beide plaaslike en internasionale beleggings oor alle sektore lok,” het hy verduidelik.

Die goewerneur het bygevoeg dat die ekspo ’n noodsaaklike ruimte bied vir boere om hul produkte ten toon te stel, innoverende boerderytegnieke aan te neem en met markte te skakel – wat uiteindelik voedselsekerheid en landelike lewensbestaan binne die streek en verder verbeter.

“KAITE is die vervoerband van verbetering vir die streek. Dit is die enjin wat die gehalte van ons produkte hoër en die standaard van ons diere beter sal dryf, jaar na jaar.

“Dit is hier waar ons leer, meeding en verbeter – en verseker dat wat ons produseer nie net vir ons plaaslike markte is nie, maar mededingend en aantreklik vir die internasionale gemeenskap is vir uitvoerdoeleindes,” het Gertze afgesluit.

– [email protected]