Onmin heers op vakansiedorp

Precious Nghitaunapo – Ongelukkige inwoners van Hentiesbaai het gister ’n klagskrif aan die dorpsraad oorhandig, wat die verslegtende toestand van paaie en toenemende kommer oor administratiewe integriteit uitgelig het.

Die klagskrif takel dringende kwessies wat wissel van padinstandhouding tot die verwydering van Red Force uit die munisipale gebou en die skorsing van die stad se uitvoerende hoof, Elizabeth Coetzee.

Wat die skorsing van Coetzee betref, eis lede van die gemeenskap dat sy heraangestel word. Hulle meen sy het ’n deurslaggewende rol in die munisipaliteit se bedrywighede gespeel.

Die gemeenskap het ook hul kommer uitgespreek oor die beweerde misbruik van openbare fondse in die uitvoering van ondersoeke wat verband hou met haar skorsing en hulle het die dorpsraad versoek om deursigtig te wees en aanspreeklikheid in sulke aangeleenthede te verseker.

Die brief wat aan die dorpsraad gerig is, het boonop die gemeenskap se kommer oor die toestand van paaie in Hentiesbaai uitgelig. Hulle meen dat die slaggate, veral op Jakkelsputzweg, ’n gevaar vir beide voetgangers en motoriste geword het.

Die gemeenskap eis vinnige optrede van die munisipaliteit om dié kwessies aan te pak en deursigtigheid in die toekenning van fondse te verseker, veral dié wat vir padinstandhouding deur die Padfondsadministrasie (RFA) aangewys is.

Verder beklemtoon die klagskrif die noodsaaklikheid om munisipale werkers vir padherstelwerk te benut eerder as om net op gespesialiseerde tenders staat te maak.

Dringende herstelwerk word ook aangemoedig vir verskeie ander paaie binne Omdel om die veiligheid en welstand van inwoners en besoekers deur die jaar te verseker.

’n Beduidende deel van die klagskrif fokus op die onmiddellike verwydering van Red Force uit die munisipale gebou met verwysing na die beweerde onwettige aanstelling van dié skuldinvorderaars.

Die gemeenskap beklemtoon die belangrikheid om wet en order te handhaaf en doen ’n beroep op doeltreffende kommunikasie van die dorpsraad oor die kwessies.

Die klag word afgesluit met ’n eis aan die dorpsraad om antwoorde binne vyf dae oor die betrokke kwessies te verskaf.

Luidens die petisie spreek die gemeenskap van Hentiesbaai sy verwagting uit dat die munisipaliteit se werksaamhede doeltreffend en deursigtig moet wees. Hulle vertrou dat die nodige stappe gedoen sal word om hul bekommernisse te takel en dat die integriteit van die dorp se bestuur gehandhaaf sal word.

– [email protected]