Namdeb skenk drie sonkrag-geisers aan Suiderlig

Namdeb het drie sonkrag-geisers ter waarde van N$79 000 aan die Suiderlig Sekondêre Skool op Keetmanshoop geskenk.

Die geisers sal as deel van voortgesette opknappings by die skool geïnstalleer word. Die skenking kom ’n belofte na wat Namdeb verlede jaar tydens die skool se galadinee gemaak het om die herstel en opgradering van koshuisgeriewe te ondersteun. Die inisiatief is aangevoer deur die adjunkminister van myne, energie en nywerheidsontwikkeling, Gaudentia Krohne, wat Namdeb genader het om steun vir die projek te verseker.

“Namdeb, as ’n maatskappy, put nie net waarde uit ons land nie, maar gee ook op ’n betekenisvolle wyse terug aan die kinders van ons nasie,” het sy gesê.

Namdeb se uitvoerende hoof, Riaan Burger, het gesê die maatskappy het ’n verantwoordelikheid om tot onderwys en gemeenskapsontwikkeling by te dra.

“Die waarde van mynbou eindig nie wanneer die ontginning voltooi is nie. Mynbou eindig en wat saak maak, is die nalatenskap wat agterbly. Vir ons is daardie nalatenskap om in Namibië en sy mense te belê,” het hy gesê.

– [email protected]