’n Huis vir Ndahafa

Die 41-jarige Ndahafa Mateus is die trotse eienaar van ’n splinternuwe tweeslaapkamerhuis ter waarde van N$600 000, danksy Metro Namibia se gewilde verjaardagpromosie.

Die lewensveranderende aankondiging is Woensdag tydens die finaal by Osona Village gemaak waar drie finaliste lukraak uit die Metro Rewards-stelsel in die finale fase van die kompetisie gekies is.

Ndahafa het haar nuwe huis as ’n “ware seën” beskryf.

“Ek is ongelooflik dankbaar teenoor Metro Namibia. Hierdie huis beteken alles vir my,” het sy gesê.

Metro Namibia se verjaardagpromosie het van November 2025 tot einde Januarie 2026 geloop. 

Die veldtog het ’n yslike 16 miljoen inskrywings via die Metro Rewards-kaartprogram gelok. As ’n bykomende bonus het Ndahafa ook ’n geskenkbewys van N$10 000 van Metro Home ontvang om haar nuwe huis te meubileer, wat reeds met elektriese toerusting ter waarde van N$20 000 spog, insluitend ’n wasmasjien, yskas en mikrogolfoond.

Die twee naaswenners, Cornelia Shilongo en Imanuel Nafuka, het elk ’n Metro-inkopiebewys van N$20 000 ontvang, sowel as ’n 9 liter-lugbraaier elk geborg deur Bennett Read.

Metro Namibia het kliënte landswyd deur die loop van die veldtog ook beloon deur meer as 100 trolliewedrenne weg te gee, met meer as N$1,4 miljoen se inkopies wat so in kliënte se sakke beland het. – [email protected]