Modderwater, droë krane vir Outjo

Inwoners van Outjo se informele nedersetting Etosha Poort is bekommerd oor die modderige water wat die afgelope twee weke uit hul krane kom, terwyl die res van die dorp sê die gereelde wateronderbrekings op die dorp is onuithoudbaar.Boonop stel die munisipaliteit glo nie belang in enige hulp wat die gemeenskap aangebied het nie en word ’n politieke kwessie daarvan gemaak. “Niemand sê vir ons wat aangaan nie. Die water is al die afgelope twee weke ‘swart’. Mense moet ingelig word of die water nog geskik is vir menslike gebruik. Die mense raak siek van die water en gaan hospitaal toe,” sê Koos Mazenge, ’n inwoner van die dorp.Mazenge sê die munisipaliteit het glo aan lede van die publiek wat hieroor gekla het, gesê hulle moet ’n doktersbrief lewer as bewys dat dit wel die water is wat hulle siek gemaak het.“Dit is net ’n gemors. Die dorp se sakemense het ’n hand uitgereik om met die boorgate te help, maar hulle wil dit nie hê nie. Daar word nou ’n rassekwessie van gemaak. “Alles is net onderstebo in hierdie dorp van ons. Die leiers rus op hul louere en niks gebeur nie,” het Mazenge gekla. Nog ’n inwoner, wat op voorwaarde van anonimiteit met Republikein gepraat het, het gesê wat die res van die dorp betref, is die water “party weke elke dag af, ander kere twee tot drie keer per week. Saterdag was die water amper die heeldag af.”Die uitvoerende hoof van die Outjo-munisipaliteit, Josef Urib, het onderneem om Republikein Maandag om 14:00 te woord te staan, maar het nie op die afgespreekte tyd sy foon beantwoord nie en ook nie ’n halfuur daarna nie.GEEN TEKORT“Outjo het nie ’n tekort aan water nie,” het Deon Verster, ook ’n inwoner van die dorp, aan die koerant gesê. Hy het foto’s van bottels met modderige water in die sosiale media gedeel, wat sy huishulp Maandag in die dorp se informele nedersetting getap en vir hulle kom wys het.“Dis nie net die water wat ’n probleem is nie, hoewel dit op die oomblik die grootste krisis is. Daar is eintlik maklike oplossings, maar die munisipaliteit wil niks daarvan hoor nie,” sê Verster. “Ons het dit op ’n mooi manier probeer doen, deur middel van vergaderings en samewerkingsvoorstelle, maar daar het niks van gekom nie. “Toe ons begin moeilik raak omdat niks gebeur nie en al die gemeenskap se werk in hul gesigte teruggegooi word, toe word ’n politieke kwessie daarvan gemaak. Dit is een van die redes waarom ek my intussen begin onttrek het.”HULP GEWEIER“Ons het met “Droom vir Outjo” se geld ’n professionele hidroloog aangestel, wat vir die munisipaliteit gewys het waar boorgate gesink behoort te word. Die eerste van die boorgate lewer ’n volhoubare 60 000 liter water per uur. Hulle rig dit egter net nie in nie,” vertel Verster.“Ons het aangebied dat die gemeenskap die pompe koop en die koste word van die munisipale tariewe verhaal, maar hulle wil nie ons hulp hê nie. Intussen moet die mense modderwater drink.“Hulle het eerder ’n plaaslike boukontrakteur gekry om hierdie einste gat aan te wys en te boor. Hoe kan ’n boukontrakteur so iets vir ’n hele dorp doen? Dit is nie ֹ’n boorgat op ’n plaas nie. Toe boor hulle die gat op die verkeerde plek.”“Ek het intussen gesien die munisipaliteit het in ’n kennisgewing die gemeenskap gevra om geduldig te wees omdat die een boorgat modder pomp.”Verster sê die boorgat, wat nou modderwater lewer, pomp andersins net sowat 8 m³ of 8 000 liter water per uur. WATERONDERBREKINGSVerster sê die munisipaliteit sê die rede vir die gereelde wateronderbrekings is dat die bestaande boorgate se watervlakke glo met 30 tot 40 meter gesak het omdat die akwifer gesak het. “Dit beteken hulle moet die pompe afskakel totdat die akwifer se watervlak kan lig. “Die eerste watergat wat deur die professionele hidroloog in ’n ander akwifer aangewys is, lewer egter die volhoubare 60 000 liter water per uur. Vergelyk dit met die bestaande boorgat wat 8 000 liter per uur bied!”Verster sê mense in die informele nedersetting en die sogenaamde “Ou lokasie” kry die heel swaarste. Hy sê die meeste waterpunte waar hulle water met behulp van ’n voorafbetaalde stelsel koop, werk nie – na raming is net sowat 30% daarvan nog in ’n werkende toestand. Hulle loop ver om water te kry en as hulle dit wel kry, is dit modderig.Verster sê nog ‘n probleem waarmee inwoners sit, is hemelhoë waterrekeninge, wat veroorsaak word deur die wind wat deur die meters loop wanneer daar nie water is nie.Inwoners vra ook vrae oor ’n persoon wat buite die dorp landerye met groente uit die dorp se boorgat besproei, terwyl die inwoners nie water het om te drink nie. – elvira@republikein.com.na

Modderwater, droë krane vir Outjo

Kommentaar

Republikein 2026-03-03

Meld asseblief aan om kommentaar te lewer

Modderwater, droë krane vir Outjo

Kommentaar

Republikein 2026-03-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.