Leerling in hospitaal ná bysteke

Tuyeimo Haufiku en Loise Shiimi

Die sesjarige Lionel Hamwele is in die hospitaal opgeneem nadat ’n swerm bye Maandag leerlinge en onderwysers by die Laerskool Ethikilo in die Oshikotostreek aangeval het. 

Toe Network Media Hub (NMH) Woensdagaand die Onandjokwe Intermediêre Hospitaal besoek het, het die graad 1-leerlinge stil in sy hospitaalbed gelê, sy gesig erg geswel van talle bysteke. Te swak en ongemaklik om te praat, het hy weggedraai toe sy naam geroep is. 

Langs hom het sy ma, Priskila Lukas, gesit en saggies ys oor sy geswelde gesig gevryf in ’n poging om die pyn te verlig en die swelling te laat sak. 

“Die verpleegsters het vir my gesê hy sal regkom,” het sy sag gesê. 

“Ek wil net hê hy moet weer sy oë oopmaak.” Die aanval het Maandag kort voor middagete plaasgevind toe ’n swerm bye op die skoolterrein toegesak en leerlinge en onderwysers getakel het. Lionel het van almal die ernstigste beserings opgedoen en bly onder mediese waarneming. 

“Ek is omstreeks 11:00 ingelig dat my kind by die skool deur bye aangeval is,” het sy pa, David Hamwele, gesê. 

Die gesin het na Onankali-kliniek gehaas waar Lionel mediese sorg ontvang het en terug huis toe gestuur is om te herstel, aangesien hulle glo nie vervoergeld gehad het om terug huis toe te kom as ’n ambulans hulle na Onandjokwe-hospitaal sou vervoer nie. 

Hamwele het gesê die skoolhoof het gesê het dit lyk “sleg” en N$100 gegee het sodat hulle Lionel na Onandjokwe kon neem vir verdere behandeling. 

“Toe ek by die hospitaal aankom, het my hart ’n slag oorgeslaan, omdat ek my kind nie herken het nie,” het Hamwele gesê en gesukkel om sy emosies in bedwang te hou. “Ek het selfs gehuil.” 

Volgens hom was die swelling so erg dat sy seun se gesig onherkenbaar was. 

“Sy gesig, hande en voete is geswel. Ek is ingelig dat die bye al ’n geruime tyd by die skool was, maar ek weet nie waarom hulle mense aangeval het of hoekom hulle nie vroeër verwyder is nie.” 

Die voorval het vrae by ouers laat ontstaan oor veiligheidsmaatreëls by die skool en of die byekolonie ’n bekende risiko was voordat die aanval plaasgevind het. 

Woensdag het bekommerde ouers by die skool vergader om die voorval en die veiligheid van hul kinders te bespreek. Amptenare van die ministerie van die omgewing, bosbou en toerisme (MEFT) het daarna die bye van die skoolperseel verwyder, wat die weg gebaan het vir leerlinge om gister terug te keer klas toe. 

Die skoolhoof het geweier om kommentaar te lewer en alle navrae na die ministerie van onderwys, vernuwing, jeug, sport, kuns en kultuur 

se hoofkantoor in Windhoek verwys. 

Intussen het die onderwysdirekteur van Oshikoto, Hilma Nuunyango-George, gister aan NMH gesê sy is nie van die voorval in kennis gestel nie. 

“Ek is nie bewus van die saak nie omdat dit nie aan my kantoor gerapporteer is nie,” en bygevoeg dat sy eers navraag sou doen voordat sy verdere kommentaar lewer. Teen druktyd is geen verdere reaksie van haar kantoor ontvang nie. 

Intussen het Lionel se ma ’n boodskap aan NMH gestuur dat Lionel beter is, maar dat sy oë nog toegeswel was. Sy het gesê dat hulle as ouers net hoop en bid en dat hul seun binnekort weer sy oë sal kan oopmaak en glimlag.

– [email protected]