Kunene reeds 15 jaar gebuk onder droogte

Kenya Kambowe - Die droogte waaronder die Kunenestereek reeds 15 jaar lank gebuk gaan het diere en mense gedwing om by die Opuwo-stortingsterrein rond te skrop vir kos wat weggegooi is. Die asgate is ’n oogseer vir besoekers, maar vir sommige inwoners is dit hul dag se brood.

Tydens ’n besoek deur Republikein se susterkoerant Namibian Sun, op die dag wat staatskole vir die jaar heropen het, het kinders van skoolgaande ouderdom na die joernalis se voertuig gehaas met die hoop dat dit iemand is wat afval kom weggooi het.

Die jong seuns tussen die ouderdomme van agt en twaalf jaar het gesê hulle woon net middagklasse by. Hulle sê van die afval by die asgate kry hulle vrot kos of materiale om te herwin.

Honde, bokke, varke en donkies op soek na kos word ook by die asgate gewaar. Toe die seuns gevra is waar hulle woon, het hulle gewys na ’n koppie naby die stortingsterrein voor hulle geskerts en weggeloop het.

Die Namibiese regering het luidens 'n 2022-verslag noodtoestande in 1992/1993, 1995/1996, 2012/2013, 2013/2014, 2015/2016 en 2018/2019 weens droogtetoestande in die streek verklaar.

RAAD GRYP IN

Die kwessie van die asgate word reeds vir jare aangemeld, maar die Opuwo-dorpsraad se finansiële uitdagings het dit tot nou toe moeilik gemaak om dit sinvol te takel. Die uitvoerende hoof van die Opuwo-munisipaliteit Matjandjara Tjihuura-Katurota sê daar is tans planne in die pyplyn om die probleem op te los. Volgens haar is N$2 miljoen nodig om die asgate te skuif en hoop die raad om die huidige terrein in ’n herwinningsentrum te omskep.

"Die omgewingsimpakstudie sal die raad nie minder as N$200 000 kos nie," het sy gesê.

"Met verwysing na die verskuiwing van die asgate het die raad reeds in lyn met die goedgekeurde 2023/204-begroting met die sentrale regering in verbinding getree.

Sy het egter verduidelik die dorpsraad moet hul finansies bestee waar dit die meeste nodig is.

"Met beperkde finansies moet ons voorkeur gee aan dit wat die dorp nodig het. Die raad is besig om boorgate weens 'n tekort aan water te sink."

MORS NIKS

Tjihuura-Katurota sê die raad ondersoek tans die moontlikheid van ’n geen-afval (zero waste) benadering. Dit sal tot gevolg hê dat rommel nie verbrand of gestort moet word nie.

"Hierdie konsep sal die raad se bedryfskostes sny en dit sal nie nodig wees om die stortingsterrein te skuif nie," het Tjihuura-Katurota gesê.

"Die geen-afval-inisiatief sal die stortingsterrein in ’n herwinningsentrum omskep en sal deurslaggewend wees vir werkskepping en omgewingsimpak. Nietemin is die watertekort vir die raad ’n onmiddelike prioriteit."

Met verwysing na die aanstelling van ’n omgewingsgerigte praktisyn vir die munisipaliteit het Tjihuura-Katurota gesê onderhoude is in Desember gevoer. Die goedkeuring van die suksesvolle kandidaat is op die agenda vir ’n raadsvergadering wat vir 15 Februarie belê is. - [email protected]

VOORTDURENDE DROOGTE

Volgens Tjihuura-Katurota het die jarelange droogte gelei tot merkwaardige uitdagings wat verstedeliking en toenemende gebruik van die stortingsterrein vir dag-tot-dag oorlewing tot gevolg gehad het.

"Die soeke na kos by die stortingsterrein het met huidige moniteringspogings verminder en die raad het die 'We Care'-projek van stapel gestuur om kos aan mense in nood te voorsien," het sy gesê.

"Kunene Spar bestuur ook saam met maatskaplike werkers ’n sopkombuis om weekliks etes te verskaf. Ten spyte van hierdie inisiatiewe, is nog ondersteuning noodsaaklik om die voortdurende hongersnood in ons gemeenskap aan te spreek. "

- [email protected]