Kulturele erfenis skep ’n inkomste

“Ons is vroue wat op ’n hervestigingsplaas ver weg van die dorp bly en waar die lewe moeilik is. Daar is geen werksgeleenthede om vir ons ’n inkomste te gee nie. Dit is net Omba wat ons bymekaar hou.”In ’n klein dorpie met beperkte geleenthede het een vrou se deursettingsvermoë en kunsvaardigheid die weg vir ’n beter lewe gebaan. Mara Britz, ’n 41-jarige vrou van Drimiopsis, 45 km buite Gobabis, sê dit is te danke aan Omba Arts se ondersteuning dat sy deur haar vakmanskap ’n volhoubare lewensbestaan kan maak.Mara wat in Drimiopsis gebore en getoë is, verkies om steeds hier te bly ten spyte van die gebrek aan werksgeleenthede, klinieke en ander basiese infrastruktuur. Sy het haar tot tradisionele kuns gewend om haar familie te ondersteun en verkoop haar gedetailleerde skeppings aan die Omba Arts Trust, ’n niewinsgewende organisasie wat reeds vir meer as 30 jaar Namibiese vakmanne (en -vroue) ophef. “Ek het in 2008 as ’n jong meisie by Omba aangesluit,” vertel Mara.“Die kunswerke wat ek skep, hou ons tradisies lewend en stel my in staat om die jonger generasies op dieselfde manier te leer as wat ons voorouers gedoen het.”Haar unieke kuns behels die brand van ingewikkelde ontwerpe op lap met behulp van ’n volstruiseier, ’n metode wat sy gebruik om kulturele erfenis te bewaar. Afhangend van die verlangde kleure, wat wissel van swart, ligte of donkerbruin, word die brandproses versigtig beheer. Elke kunswerk neem haar drie tot vier ure om te voltooi. Deur net drie stukke per maand te verkoop, verdien Mara ’n groot genoeg inkomste om in haar familie se basiese behoeftes te voorsien. “Nie almal van ons ontvang maatskaplike toelaes van die regering nie en ons moet gevolglik ons vaardighede gebruik om ’n inkomste te genereer,” vertel sy. Haar toewyding het reeds vrugte afgewerp.“Ek kon nooit ’n huis bekostig of ’n werk kry nie, maar Omba het dit vir my moontlik gemaak om ’n huis te koop met die kunsvlyt wat ek maak,” sê ’n dankbare Mara. Danksy die Omba Arts Trust word kunstenaars soos Mara bemagtig om nie net te verseker dat tradisionele Namibiese kunsvlyt bly voortleef nie, maar ook om ’n volhoubare inkomste aan landelike gemeenskappe te verskaf. Vir Mara is Omba meer as net ’n organisasie, dis ’n reddingsboei wat haar artistieke passie in ’n stabiele toekoms vir haar en haar gesin omskep het.– republikein@republikein.com.na

Kulturele erfenis skep ’n inkomste

Kommentaar

Republikein 2025-11-05

Meld asseblief aan om kommentaar te lewer

Kulturele erfenis skep ’n inkomste

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.