Kriminaliseer aanvalle teen 'hekse'

Henriette Lamprecht – Regerings moet verseker voldoende finansiële en menslike hulpbronne word toegeken aan enige program, beleidsrigting of aksieplan wat fokus op die uitwissing van beskuldigings van toordery en rituele aanvalle.

Skadelike praktyke verwant aan beskuldigings van toordery, ingesluit fisieke aanvalle teen ’n persoon en eiendom en gedwonge verskuiwing, moet voorts gekriminaliseer word. Gepaste bewusmaking en programme moet ook verseker regters, regsverteenwoordigers, aanklaers en wetstoepassingsbeamptes beskik oor die nodige vaardighede om dié tipe sake te hanteer.

Dié riglyne is vervat in Guidelines towards the elimination of harmful practices of witchcraft accusations and ritual killings in Sub Saharan Africa wat onlangs deur die Pan-Afrika-parlement in Suid-Afrika aanvaar is. Die sitting is deur verskeie parlementslede uit Afrika suid van die Sahara bygewoon.

Berrie Holzhausen, stigter van AlzheimerDemensieNamibië (ADN) wat hom onverpoos beywer om veral lig te werp op demensielyers wat dikwels as hekse of getoor beskou word, het ook die bekendstelling bygewoon.

“Afrikaleiers uit verskeie sektore van die samelewing het byeengekom en erken die geloof in toordery is baie algemeen in Afrika.

“Dit is elke mens se reg om te glo of nie, maar jy het nie die reg om jou geloofsoortuigings te gebruik om ander mense skade te berokken, hul menseregte te ontken en selfs in die naam van jou geloof mense dood te maak nie.

“Die dokument, wat gegrond is op jare se navorsing van verskeie mense en organisasies, maak dit baie duidelik dat sulke praktyke onaanvaarbaar is en uitgewis moet word,” het Holzhausen gesê.

Hy het ook die geleentheid gehad om Namibië se situasie te verduidelik en daarmee saam bewusmaking van demensie te doen.

Duisende mense in Afrika staar skadelike praktyke in die gesig wat verband hou met beskuldigings van toordery of rituele aanvalle wat dikwels bestaan uit ernstige menseregteskendings en reeds gemarginaliseerde individue en bevolkings, insluitend vroue, kinders, bejaardes, sowel as mense met gestremdhede en albinisme raak.

Voorbeelde van dié praktyke sluit in die marteling van mense wat van heksery beskuldig word om hulle te dwing om te bely, gewelddadige aanranding, verbanning uit hul gemeenskappe of selfs die doodmaak van diegene wat daarvan beskuldig word dat hulle heksery beoefen.

Mense wat van heksery beskuldig word, staar volgens die dokument verskeie struikelblokke in die gesig wat hul menseregte skend, insluitend stigma en uitsluiting, verbanning en ook wrede en onmenslike behandeling. Dié struikelblokke plaas op sy beurt ’n demper op die toegang tot gesondheid, onderrig, werksgeleenthede en ’n voldoende lewenstandaard.

Die dokument maan verskeie gapings bestaan om bogenoemde kwessies hok te slaan en wat wissel van onvoldoende wetgewing om beskuldigings van toordery aan te spreek. Ander sluit in die ondoeltreffendheid van die regstelsel om oortreders te vervolg en die afwesigheid van die rehabilitasie van slagoffers en die herstel van hul lewensbestaan om omvattende toegang tot geregtigheid vir slagoffers te verseker.

Die Pan-Afrika-parlement stel voor die burgerlike samelewing werk saam met regerings om ’n nasionale aksieplan te ontwikkel en te implementeer, terwyl tradisionele en godsdienstige leiers onmiddellik alle praktyke staak wat rituele aanvalle en beskuldigings van toordery bevorder.

– [email protected]